SUANGTUAHNA

School kan luh tran ni a ni leh ta reng mai! Kan class neih hmasak berah chuan professor fel hmel zet hi a rawn lut a, a sawi ang chuan kan bul threuhva thrute chu inhmelhriattirna kan han nei a.
Ka hnunglam atrang chuan tu emaw hian ka dar a rawn vuan a. Ka han en nak chuan mak tih avangin ka trawngchhuak mai thei lo. Pitar! ka sawi uar pawh a ni lo. Tê tak tê ka pite rual zet tawh tur hian, “I dam maw? Hmelthra, ka hming chu Rose a nia. Ka kuah thei che ang em?’ a rawn ti a. “Thei tuk e a,” tiin ka lo chhang a.
Duhthawh tak hian min kuah vawng vawng a. Kan han inthlah hnu chuan fiamthu titak hian, ‘Hetiang kumah te College-ah i hmel ka hmuh tak mai. Naupang chumchiap mai i la ni si a?” ka ti a. Ani pawh chu a dang duh chuang lo. “Enteh! Hetah hian pasal hausa deuh zawnga rawn lut ka nia, ka nei ang a, fate kan nei ang a, nuamsa takin ka khawsa ang tiin ka suangtuah maw le,” tiin min chhang a.
“Ka fiamthu miah lo a nia, min chhang thra teh,” tiin ka han ngamtlak biak nghal ngawt a.


“A..., dam manah college vawi khat tal han rah loh chu tiin ka rawn zir thra leh a ni deuh ber e.”
Class kan neih zawh hnu chuan S.U pindanah chuan thingpui kan in dun a. Ta trang chuan kan inkawp chho ta chawt a, kan innelna piah lamah kan inkawmngeih em em mai a ni. Kan thrut dun tawh hi chuan a thusawite chuan mi zem â tlat a, a thusawi chu chilthli tla lo chauhvin ka ngaithla dauh dauh thei zel a. A hnen atrang chuan thufing tak tak ka zir chhuak ta treuh mai.
Kum a vei dawn meuh chuan Rose-i hre lo reng campus-ah chuan an awm tawh lo, kan college icon hi a ni ber a, thrian a siam thiam a, kan inthuam dan ang chiah hian felfai takin a inchei thrin.
Semester kan zawh dawn chuan Football khelmualah kan college zirlai zawng zawng intihhlimna leh inthlahna kan nei a. Chumi truma thusawi tura kan sawm chu khawvelah hian ka tifuh berin ka hria. A tirah chuan a trang ve nasa trauh trauh khawp a, mahse mi zawng zawng deuhthawin kan han nawr takah chuan a rawn ding chhuak ta.
“Beer ka nghei tawh a, Whiskey-in thlak ka tum a, a rum lutuk mah mah a lo nia,” tiin bul a han tran phawt a. Ngaithlatute chu kan nui nghal dar dar a. A hrawka hnawk chu a han thian a, “Kan upat avangin infiam hi kan bansan lo va, kan upat avangin infiam hi kan peih ta lo mai a ni. Thil pathum upat theih miah lohna ka rawlhruk ang che u. Hlimna, hlawhtlinna leh Suangtuahna. Enteh u, in suangtuahna kha inhloh ni la lain in thi tihna a ni. Vawiinah pawh hian thi tih inhre lo, khawlaia kal tam tak an awm mek asin.
Upat lam pan leh thrang zel tih hi thil danglam tak thil thuhmun lo a ni a. Kum 19-a upa ni la, kum khat chhung engmah ti thei lovin khumah mu ngat ngat la, a kum lehah kum 20 i lo ni ang a. Kei hi kum 87 ka ni a, kum khat chhung mu ila a kum lehah kum 88 ka ni dawn tihna a ni a. Tuate pawh hian upat lam chu kan pan zel a lawm. Ka sawi duh zawka chu kan thrang tur a ni tih hi. Chu chuan keimahniah pawh danglamna a thlen ngei thrin. A thusawi khar nan chuan hla mawi tak, ‘The Rose’ tih chu a rawn sa a.
When the night has been too lonely
and the road has been too long
and you think that love is only
for the lucky and the strong
Just remember in the winter far
beneath the bitter snows
lies the seed
that with the sun's love
in the spring
becomes the rose
A thusawi leh zai chuan min hneh hlawm ngang a ni ang e, kan ngawi thrap a, thawm bengchheng reng reng a awm lo. Kum eng emaw zah chhung a lo suangtuah thrin college degree chu Rose-i chuan a nei ve ta.
Graduation day atranga kar khat liam hnuah Rose-i chu a mu hlum a ni tih min rawn hrilh a, min thrawng kher mai.
Amah thlahna hnuhnungah chuan college zirlai 2000 chuang daih kan pungkhawm a, zir tur tam tak min hnutchhiahin a hmabak ropui takin a hlen ta bik a ni.