Kan hmasawnna tur (Paper present - Sap Upa Group Nite)

Ka theih ang tawkin ka inbuatsaih ve a, vawi tam tak thai chhiata ziah thatin tuna mi kha min chhuahsak ta a ni. A phek a tet avangin kim lo leh fel hlel pawh a awm ang, a titu tihawm tawkah min ngaihsak mai dawn nia.

Hmasawnna tur nei lo nia kan inhriat hun hi dam reng chunga kan thih hun a ni ta ve ang. Hmabak hlen hi hmasawnna pawimawh tak a nih rualin hmasawnna tur kan ngaihtuah fo a tul thin. Hmasawn tur hian danglam i ngam em? He zawhna hi i rilruin lo chhang teh le. Har deuh a nia aw! Hmasawn tur hian i fit em? Lo ngaihtuah chhunzawm zel la. Hmasawn duh avang hian mi tam takin an lo tuar tawh a, an lo chan tawh. Chung mite hmasawnna kawng siala kal rikngawt hi kan tihtur a ni lo va, chu kawng an lo sial tawh chuan tawp chin a neih avangin sial chhunzawm zel hi kan hna a ni.

Hma i han sawn dawn teh ang...

Mihring kan nih avangin hmasawn kan mamawh a, kan telna pawl engah pawh kan hmasawnna chuan rah tha tak a chhuah tur a ni a, kan hmasawnna rah teltu tur pawimawh berte zinga mi a ni bawk.

KTP Ramhlun Vengthar Branch tana hmasawnna turte kan inchhawpsak dawn a ni. Hetah a kimin i hmu dawn lo va, kan tarlang seng hek lo! Kan theih ang ang kan hrut dawn a ni. Kan hmasawnna turte chu han thlir tlang teh ang...


Inkhawm

KTP member zawng zawngten part kan pek tam berna chu inkhawm hi a ni a, kan inhmuh khawm tamna ber pawh a ni. Member 500 chuang awmnaah 100 bawr kan inkhawm hram a, kum dang aiin hma kan sawn tih thute hre ve thin bawk mahila kan hmasawnna hi a tam lam zawnga teh chuan tlem tak a la ni hrih.

Kan hruaituten ngaihtuahna nasa tak sengin inkhawm programme te an han chawk kual a, a changin veng dang atanga thla tin vawi khat zaithiam/ thusawi thiamte an chaw lut thin. Chumi awmzia chu theih ang tawka tam member-te biak inah inkhawm se an tih vang a ni. Kuminah erawh tih dan an thlak a, mahni intodelh an thupui niawm tak a nia. The Hunt kan hmang chho zel a, keini pawh min la zaitir hial awm e!

Chutianga lo nih takah chuan inkhawm hi member-te tihtur a ni ta mai a. Inkhawm hi chanvo pawimawh tak kan chan, kan tihhlawhtlin tur a ni. Thlarau lama kan dawn tur vel chu ka sawi pha hauh lo va, khawi pawlah pawh member-a kan inpek hian tihtur kan nei. KTP member-a kan inpek chuan kan tih ve tur leh hmasawnna tur pawimawh tak pakhat chu inkhawm hi a ni.
Kan inkhawm boruak leh kan khawvel nun hi a inhne lo hlein mi thenkhatte chuan an sawi. Dikna mual mual a awm awm e. Kohhran fir leh tikher kher atanga chanchintha dawng kan ni a, kan inkhawm kalphung pawh hi a puithu thei viau. Inkhawm programme chungchangah chuan tarlan tawh angin kan Branch kalphung hi a rualawh thlak lohvin a zahpuiawm loh khawp mai. Chutih rual chuan sermon tam zawk hi ngaithlatute tana ngaihthlak peihawm loh khawpa nawi a ni. Sermon chang thlan leh a thute a nawi tihna lam ni lovin a sawitute awka hi a nawi a, titi mai mai paha tep liam mai mai hi a tam khawp mai. Inzirtur kan ni a, kan hmasawnna tur pawimawh tak pawh a ni.

Member tinte activities tam theihna tur kan ngaihtuah chho zel a, pakhat belh ka duh chu Group discussion hmang thei tura thupui sawi leh paper present ang chi hi a ni. Hengah hian member tam zawk kan sawiho thei ang a, part kan lak a kan pek fo hian tu ate pawh kan phur a, nuam kan ti thin. Sawihonaah erawh branch hruaituten member kian hmasa zawk thin se.

Member hla kohkir

Member hla kan vei dan chiah hi inhriat ni lo mah se a langah chuan kan vei deuh vek niin a hriat a. Biak in chhung chauhva hrechhuak thin lo hian mut mawh hnar mawhah nei ngat ila chuan heng member hlate hi kan kokir thei ngei ang.

I ngaihtuah ngai em? Member hla nia kan ngaih thinte an rawn inhmang a, an rawn luh thuk tak takah hian han zawt chiang ila, ‘Member-te min puihna’ tih lam aiin ‘Mahnia tum reng vang’ tih a tam zawk ngei ngei ang. Mahni duhthua tih mai tur tih pawh kan chang chawi mai thei, Member leh hruaitu tumah ka phut lo va, mahse kan rawngbawlsak Lalpa erawh chuan titurin min phut tlat.

Thilpek/sum

Thilpek hmanga kan rawngbawlna hi a tam lam sawi mawi ka tum lo. Sum hi pawl leh kohhran din chhan a ni hek lo. Chutih rual chuan eng pawl mah hi sum tel lo chuan a khawsa thei lo tih kan hriat a tul. Pathian ram zau zelna atan hian eng ang chiahin nge ka thawh tih hi a rauva chen loh chuan hriatthiam har tak a ni. Kei pawh ka bang bik lo, mihring kan teh a, kan en chhung chuan thilpekah hma kan sawn dawn lo. Kan pek lama kan chian a ngai a, chumi hunah chauh chuan thilpekah hian hma kan sawn ngei ang. Chutiang a nih theih nan chuan member tinte leh hruaitute kan va pawimawh tak em.

Sum chungchang sawi thei tura thawh hnem ka ni lo. Biak ina thawhlawm chungchang sawi hian ka lo tim thin. Mi in a phal ang tawk a pek kha pe tam tura inzirtir hi kan tihtur a ni chiah em? Kan mamawh a nih chuan kan sum hman duhna felfai takin sawi ila chumi atan chuan sum kan mamawh a, i tang deuh ang u tih mai a tawkin ka hria. Hmasawnna chi khat chu a ni ngei mai a, mahse kan hmasawn tumna kawng hi intihsiakna dawhsana lan loh hlauh vanga sawi rik hi a tam zawk a ni zel. Chu chuan hmasawnna khingbai a thlen thei a ni.

Zaipawl

Kohhran kutke kan nihna kawnga pawimawh tak pakhat chu zaipawl hi a ni. Zaipawl hi KTP member tawh phawt telna tura zau taka kawng hawn a nih avangin zaipawl chhiat thatah nasa takin mawh kan phur tih kan hriat thar a ngai hle mai. Tun dinhmunah chuan hmasawnna lam aiin zuih lam kan pan mek niin a lang a. Zaipawl tinunga tichak thei tur hian hmasawnna rahbi kan rahpui dawn em?

Zaipawl thatna kohhran chu kan hmu sang viau zel a, chumi dinhmuna kan ding ve thei lo hi kan buaipui a ngai. Zaipawl hian buaipui a hlawh rei ta hle mai. Kum eng emaw zah liam ta atang khan kan kohhran hian zaipawl kan nei chau ta hle a. Hruaituten ngaihtuahna thar nen thil thar han duang ve chiam thin mah se a sawt mawh ta hle mai. Member-te thiam loh nge hruaitute thiam loh tih hi hriatthiam har tak a ni.

Programme

Programma ka han tingawt a, a huam zau duh phian awm e. Biak in atanga pawn lama kan chhuah thleng hian a tel thei vek turah ka ngai. Programme duangtuten ngaihtuahna nasa zawk kan sen deuh deuh a ngai tih kan hriat thar a pawimawh a. Programme kan hman danah hian nasa takin hma kan sawn a tih theih rualin member tam zawk a hip zawh loh fo erawh chuan hma kan sawn lo tih kan pawm ngam a ngai a ni. Chutih rual chuan programme-a zira inkhawm duh chin neih hi Kristian Thalai Pawl member nih nena inhmeh lo tak a ni.

Programme kan siamin member tê ber atanga a lian ber kan ngaihtuah thleng thin tur a ni a. Kan hlawkpui chiah ang em? Hei hi helai hmunah hian sawiin ti ta ila a inhmeh ang em tih pawh kan chhut tel vek a tul thin. Programme tla chawp kan hlimpui viau laia mi ina hman leh nulh tum kan nei fo va, programme awmsa thlaka ‘Sharing leh zaiho’ tih leh ngawt thin hian programme duangtute zia a tarlang thin khawp mai.

Branch dang tlawh, Blanket suk, Literature Week, Sports etc te hian kawng eng ang chiahin nge hma min sawn tir? Huau huau ang maiin a ral thin nge intihhlimna chi khat?

Member-te tana kan hun kan siam dan hi hriatthiam a har khawp mai. Kan branch aia lian leh zahawm zawk, Branch upa zawk lakah chuan kan kimki tlat nge ni Branch dang kan tlawh reng reng hian keini aia branch te nau ve tak tak kan tlawh ziah. Chung kan tlawhte tan chuan entawntlak thil eng nge kan hnutchhiah a, an lak atanga entawn tur eng nge kan neih le? Anmahni laka kan in pholan duhna a ang lek lek zawk thin.

Literature Week hi ka sawi duh. Kan hmang ta fo mai a, hei hian hmasawnna min thlen tak tak lo a ni tih pawh huai takin ka sawi duh bawk. Ziak mite hla phuah mite eng eng emaw kan zawng a, chumi hmang chuan kan intihsiak a, chunga pakhatnate chu eng hehuah an chhuak leh ngai lo. Kan ti leh a nih pawhin hmasawnpui thamin ti ila, Literature zungzam inzem tir thei khawpa programme kan duan a tul a ni ang e.

Hnatlang/ Sumtuak

Hnatlang hming puah chuan Blanket suk hian kan thawk chhuak hnem thei deuh ber awm e a! A bak leivung paih, lung thiar etc velah erawh inzawn khawm leh infawm chawpa thawh tak hi kan ngah fu mai. Sum kan mamawh avang te, Kohhran hna kan thawh a ngaih avangtein hnatlang hi Group leh Branch ten a ko thin a kal erawh hmel ngai a ni fo. Hruaitute ngaichang leh ngaihven taka hetiang hunahte hian kan tel tam fo hi thil tha a ni satliah lo va, hmasawnna leh inzirna tam tak min petu a ni ve tlat a nia.

Khawtlang tan hmasawnna thlentu

Mizorama kohhran lian berah kan lawi a,, kan sukthlek ang zelin Zoram pawh a che vel a ni ber. Chuti a nih chuan khawtlang chhiat thata mawhphurtu pawimawh tak kan ni tih kan hriat reng fo a tul awm e. Kohhrana kan rawngbawlna kan vei ang hian khawtlang hi vei ngat ila chuan hetiang dinhmunah hian kan ding kher lovang. Khawtlang hmasawnna tur hian kan KTP-na hi a hman tlak a, a rintlak a, a chhawr tlak asin.

Kan tum/innghahna leh thupui kan hlenna kawngah

Tum hlen hi hmasawnna a ni. Tum/thupui leh innghahna KTP-te hian kan nei. Chung tihhlawhtlin chu kan hna a ni satliah lo va, kan hmasawnna tehkhawng pawimawh tak pakhat a ni. Heng kan tarlante hi kan hmasawnna tur atana pawimawh berah kan hmang fo tur a ni.

Rawngbawl tura chhandam/ Krista chanchintha puandarh

He thu hi chiang tak leh fiah taka inhrilh nawn fo tur kan ni. Hrefiah ni ila chuan sawi mawi ngai lo a lipuia kan luhchilh huk hi a hun tawh. Chhandam kan nih kan chiang a, a hnu leha rawngbawlna hi kan hmaih ta thin. Kan hmasawnna tur a ni.

Missionary challenge/ rawngbawltu challenge te hi siam thiam ngawtah a innghat lo va, rilrua intuhsak theih thil a ni. Chan huama Lalpa tana thawktu tur hi thalaite zingah Lalpan a zawng mek a, nang leh kei hi he khawvela Krista chanchintha darh zau zel theihna tura hmasawnna kawng sial theitu kan ni.

Rawngbawl tura chhandam kan nihna hi chiang tawk leh fiah tawka inhrilh hre reng tur kan ni a, sawi tawh awm thei lo a ni. Hemi hi kan hrefiah a nih ngat chuan Rawngbawlna leh rawngbawltu dinhmun leh awmzia hi sawi mawi ngai lo leh sawi that ngai lovah kan chhuah thei.

Mahni inngaihpawimawh hian hmasawnna a tithuanawm

Rawngbawlnaah hian mahni inngaihpawimawh leh indah san hi thil pawi tak a ni. Krista tana kan rawngbawlnaah hian pawimawh lutuk, loh theih loh tling khawp kan awm lo. Kan tel lo pawh hian rawngbawlna a kal thei tih kan pawm ngam a ngai a, mahni indah pawimawh leh inngai pawimawhte tel miah lo hian rawngbawlna hi a kaltluang tha thei zawk za mah lehnghal. Mahni in ngai pawimawh chunga rawngbawlna hian hmasawnna a dal a ni tih i hre reng ang u.

Hruaitu mahni chauh inngai pawimawh mi hian an dinhmun a derthawng mai ang tih an hlau fo thin. Chuvang chuan a hnuaia mi ni thinte hruaitu an lo nih ve theihna kawng a dal fo bawk. Rawngbawlna kawnga hma kan sawnna tur pawimawh tak chu rawngbawltu tha chher hi a ni.

Thlarau mi deuhte kan awm a, rau riau ruau pawh kan awm nawk mai. Thlarauva khat nia inhriatna chapopui hi rawngbawlna nena inhmeh lo pakhat a ni. Thuthlung thar bu hi keu chhuak vek ila, ‘Thlarauvin ka khat a,’ tia sawi thei reng an awm loh laiin tunlai mite chu kan khat liam hma thei em em mai a nih hi maw. Eph bung 5:8-ah chuan Paulan, “Thlarauva khatin awm zawk rawh u,” tiin mi a fuih a. Chumi zawmzia chu khah loh hun a awm thei tihna a ni. Hei vang hian a nia Paula khan a khah thu reng a sawi ngai loh ni. Thlarauva kan khah ngat chuan kan sawi a ngai lo, kan tawngtai duah hluah pawh a ngai hek lo, mi zinga Pathian thu sawia kur pui chiam pawh a ngai chuang lo, kan awm danah miten an hre mai. Chumi tur chuan hmasawnna kawng kan zawh a ngai a ni.

Isua Krista rinna leh amah anna kawnga thalaite hruai

He kan thil tum hi tihhlawhtlin harsa ber zingah a tel awm e. Hemi kawnga thalaite kan hruai thei lo a nih pawhin mite rinna tibuai leh tiderthawng zawng a kan khawsak loh a, Lal Isua anna kawnga kal mek kan member-puite tawiawm dan kan thiam a pawimawh hle.

He kawngah hian tunge kan hruai tawh le? Member hla heti zah kan neih ringawt pawh kan kokir thei lo a nia, tun dinhmunah chuan kan tum kan hlawhchham rih a ni.

Kohhran kutke ni tura thalaite buatsaih

KTP-te hi kohhran kutke pawimawh tak kan ni. Kohhran kutke ni tura thalaite buatsaihna kawngah eng ang chiahin nge hmasawnna kawng kan zawh tawh tih hi hruaituten kan ngaihtuah thar fo a tul a ni. KTP member heti zaha hei zawng chauh kan inhuikhawm thei hi inenfiahna tham a tling.

Thil tha tih

KTP te innghahna chang chu Ephesi bung 2:10 a ni. Thil tha ti tura siam thalaite kan nih anga thil tha tihna kawngah theihtawp kan chhuah zel hi kan hmasawnna tur a ni. Thil tha ti tura siamte hian thil tha lo kan lo ti fo tawh awm e, kan insiamthat ngat chuan kan thil tha tihten rah tha leh duhawm, Lalpa lawm tlak a rah chhuak ngeiin a rinawm.

Hmasawnna hi hmuah chhuah theih chu a ni na meuh mai. Pathian tana kan rawngbawlna kawngah erawh hmuah chi a ni lo. Mahnia thawh chi a ni. Chumi tur chuan mimal tinte kan pawimawh theuh va, kan hma zawn zela kawng kan sial te, an sialsate zawh thei tura kan ngaihtuahna kan sen a ngai a ni. Kan rawngbawna hrang hranga hmasawnna turte hi kan kutah a awm e. Hmasawnna kawng zawh tur hian kan tha tawk a, kan thei tawk a ni Lalpa nen.