THALAI HARH RAWH

Hman zan lawk khan Mizoram sorkar inrelbawl dana lungawi lo thralai eng emaw zah chu an pungkhawm a nih kha. Kha khan Mizoram hmabak hi engtin nge ni zel dawn tiin thui takin ngaihtuahna mi a siamsak a, thralai riltram hi eng hmanga hrai tur nge tihte chu ngaihtuahna luahtu ber an ni. Lungawi lohna chang hria thralai kan neite hi thralaite thran harh tawhna lantirtu pakhat chu a ni chiang a ni. Keima pual a ni a, sorkar ka kheng dawn lo, thralaite thranharh ruala kan thran harh ve loh erawh ka hlau. Chutiang kan nih vaih chuan hmasawnna khawvelah hian kei hi nek chepin ka awm dawn chiang. Kohhran thralai pawl lian ber leh YMA pawh kan thurual thra hlei thei lo, kan programme pawh kan inzahsak tawh lohnaah hian thralaite hi thranharh a ngai ta.

Thralai fuihpawrh i nuam lua e
Hnatlang turin emaw YMA/ khawtlang/ kohhran programme a awm a, inkohkhawma kal thra duh lo kha SRS thawmah kan inkokhawm a, chutah chuan kal tur tiin hruaituten min han hrilh a, haw haw chungin kan han pan huk mai thei te hi i ngaihtuah let neuh neuh thrin em? A trul huna pawr nachang hre lo khan engah nge rul zen nana i kut kha hman i phal tak mai le! Mi pawh an zuang a lawm tia tang hru hru a mahni zuanna tur pawh en nachang i hre lo a nih ngat chuan i tla thum dawm ngei ang. Thralaite hi tu fuihpawrh tur mah kan ni lo, mite kawra che tur pawh kan ni lo va, rul kaw zenna atana kan kutte hi hmansak tur kan ni lo bawk.

Kan ti thei asin
Mahni veng kawn khawilai emaw velah kan thru bawr luih a, eng pawl emaw rorelna kan sawisel a, kan phun liam liam a, kan phun ral fo. Kan phun thrinna kha a taka tilang ngam kan awm lo. Kan dawihzep tihna em ni? A ni si lo! Thralaite hian hlauh kan nei lo. Mahse, thil mawi chu kan zawng ve. Eng pawlah pawh hian chanvo i nei tlem tih i inhria em? I tan hmun a tlem tih pawh i hre tel bawk em? I tel lo hian pawl tam tak a kal thei tiha intrawngkhumte hi nâ tihna chang kan hria em? Hnatlang tur atan chuan thralaite an hre reng ang che u, mahse in hlimna tur erawh an ngaih thah lawi si. Kohhranah a ni emaw, khawtlangah a ni emaw kum khata i chanvo neih hi sawi tur a lawi i nei lovang. Chhiattawh leh inkhawm tih vela part rinawm taka pek ringawtah hian thralaite kham khawp a awm lo. Engah nge i phun lungawi mai thrin. Hetiang ringawta inkaihruainaah hian i lungawi bik em ni? Tho la harh rawh. Mahse nangmah mai chuan i ti thei lo.
Thralaite kan tranrual a ngai .

Lehkhathiamte u, min hruai teh u
Lehkhathiamte u in thiamna kha kan mamawh tih hi min theihnghilhsak lo hram bawk ang che u. Feh thlen ngawt nan lehkha hi zir suh, thiamna pawchhuak thei zawng leh i thralaipuite leh kan veng tihmasawn thei turin i ngaihtuahna kha min sensak la, min han kaihruai ta che u. Mi hawi zau, ngaihtuahna hmang thiam leh khawtlang inlungrualna kawnga hma la thiam kan va mamawh che u em...

Harh mawlh teh
Ang lungawi a, phun ral mai thrin lo hian siamthrat ngaite siamthra tur hian thralai kan tling tawk tih hria la, kan hmabak thralaite khawvel thar hi min han thlir pui teh u.

(19th August, 2007)