Chapchar Kut 2009

Babutea te an liam a, kan hmuh thrinte tho kha pavillion lamah an thru! Penglengpunga a la inngaitlawm tluang zel a. 'Kelawngin' a rawn kal! Eli pawh a pa quota ni maw a awm tawh lo nia kan hriat laiin a la rawn nalh bon. Chapchar Kut leh 'KHU' hi ngaia neih mai tur em ni aw? Kut pui kan han lam khum tak tak mai chu nuam tak a ni tih aiin 'Khu tak a ni,' ti ila kan inhmeh hmel! Chhawnghnawtna tura bawn(Bun) themin Mami Varte an vawm vel a, vawi khat phei chu a chalah chiang takin a fu! Ani zai lai chiah hian Stage-ah Pulit an rawn ding kual vel... einch!

Mizote Kut zinga huapzau (Huapzau tih hi a dik zawk ka ring. Threnkhatin 'Ropui ber' an ti deuh kher) ber Chapchar Kut hman chhan kan hria. Dik taka sawi chuan Chapchar Kut hmang thei hi tlem tê kan ni tawh! Lo an vah zawh awllen laia hman a ni a, an lo vah laia zum leh hriam kara him taka an awm lawmna atana kan pi leh puten an lo neih fo thrin a ni. Lo neia eizawng ve lo Aizawla kamding lian thra thrate kan han inhawt buk vel hian Kut hi a tiropui lo va, ngaihhlut ai mahin hmuhnawm thlira thlir Mizo zingah hian kan tam ta.
Inhlawhna a nih avanga lâm leh zai kan tam ta lutukte hian he kût hlutna leh huap zauna hi a tidal a ni. Mizo taka kut hman kan duhlaiin modern kut tia sawi a ni a, Mizo zia pholan kan tum ulh lutukna lamah kan zia leh chin dan pel rak raka kalpui chang kan ngah hle.
Kan ram threnawm maia Hornbill Festival an tihte chuan ngaihhlut a hlawh a, ramdang mi tam tak a hip thei. Engvang nge kan tih chuan an hnam ze rang kha a ngai ngaiin a la hmuh theih tlat a, tui pawlh lovin an la hmanpui thei a ni. Keini erawh a kum telin min rawn hmanpuitu an tlem tial tial a, sawm bikte chauh an rawn inlan ta mai hi ngaihtuahna tithuitu a ni.
Kut kan neih ve chhun chhunte kha Kristianna avanga hman chhunzawm rem lo a lo ni vei nen, Zofa rualawt reng reng hian Kut hmantlak leh tihtlak kan nei ta meuh lo. Krismas a lo nia, kan kutpui kan tia, ruai kan threh a, a liam mai. Mizo ze phawk chhuak thei tur Kut ropui kha kan tlin lo a nih pawhin miten Mizo an hriatrengna tham kut ngaihtuah a ngai niin a lang.