Eng tin nge kha(h)?
Hmanah tia bul tan a ngai dawn a va ang ve, kum engzah chiah nge liam ta kha aw... sawi lo law law teh ang in lo chhut ve palh ang a, in chhut khaw lo vang! Ka han thar thawh ni tih atrang khan sawi daih teh ang, tichuan lo chhut buai mai teh se...
December khaw vawh lai a ni a, khaw vawh dan chu ngeiawm lam a pawh lek lek zawk a nih kha. Ruah a la sur zui! Khua a thim tak ngial dawn a, haw a hun tawh si a, kawnga i kal lai ka ko ding ve chawt che a, i nihliap ka inzawntir che a nih kha. I hmel pawh kha ka enchiang chuang lem hlei lo va, enchiang turin khua kha a eng tawh mang tlat lo. Chutah dan pangngaiin power supply a awm lo!
Ka zahtheih loh chhuahin ka be lum lam viau thin tak na che a, ‘aw’ leh ‘aih’ tih bakin min chhang ngam lo a nih kha. Kan veng thlen hma ah inbe mumal miah lovin kan inpensan ta a nih kha ti raw! Mahse kan inpensan rei lo kher mai, thla khat a liam meuh chuan inpensan harsa ti khawpin kan haw dun tawh!
Tuan tul vangin!
Hunin min dang chep a, kum a liam tam hma ngeia zirna chhunzawm a ngaih avangin tlang hranah kan han awm ta a. Inngaih nat zia kha ka sawifiah thiam lo! Lunglen an tih hi hei ngei hi a nih hi ka ti fo.
I hria ti raw, kum 4 i awm bo va, i awm bo kumah vawi 2 lehkha ka rawn thawn ve che kha. Ka nuihte hi a la za, i tihral vek tawh ka ring. Ka dawn tur ni se, khatiang khawpa lehkhathawn ziak thiam lo kha ka ngaizawng ang tih ka va han hlau tak. Mahse love is blind an tih kha maw!
A tir lamah kha chuan biakhlatna hmangin kan inbe ve zeuh zeuh thin a. Nangmah be tur che khan hun a ngai a, tha a heh bawk. Kan in atanga phone booth awmna kha chho hlir, mel chanve vel zet a ni a, chutah mi dangin an lo hman chuan nghah a ngai a. Nangmah biakpawh theihna number dial hnu khan nangmah ko tur mi 2 vel an intirhchhawn hnuah hah tih hriat tak hian i rawn ‘Hello’ thin a nih kha. Ka tan chuan kha kha aw mawi ber tlingin; ka bengah hian a ri a reh thei lo! Ka chhanna che chu ‘Hello’ kha a ni mai a, sawi tur ka hriat loh thin zia kha! Lehkhathawn leh phone hman lamah hian zirna sikul awm se a bul atanga zir that leh a nia ka duh hial thin ni.
Danglamna khawvel
Kum 4-na i hman kumah khan vawi khat mah ka rawn be lo che a nih kha. Thiam thu hi sawi tur ni se, phek eng emaw zah daih ka nei. Mahse, tun thleng hian sawi lohva ngawihbopui ka duh ta zawk.
I rawn chhuah theih kum a lo thleng a, ka training ka zawh kum a ni bawk a, phur namen lohvin ka phur a, ka helhhawlh a ni ber. Kan khua panin Bus lian chiah ka rawn haw a, Bus station-a ka farnu pawr ve chap min lo hmuaktu hmelte chu ka hmuh that ber ni a ni hial awm e. Phur takin ka bungruate ka sengkhawm a, ka farnu chu a theih ang ang lo hawpui turin ka chah a, a hmelah chuan a lungawi lo tih ka hre mai, mahse i hmel hmuhna turin ka farnu lungawi lote chu nep ka ti lutuk.
Kan in pawh tlawh hmasa lo chuan i thlen hmasak zawk ringin chanchin ngaichangin in in ka rawn lut a. I nu vawk chaw chhum chuan min lo chibai luam a nih kha. I awmna han zawh dawt ka hreh tehreng nen i nu hnen atanga i chanchin ka hriat chuan ka khawvel a ti danglam ta!
Duhsakna sang ber
Kha kum li ka nghah kha a thlawn a ni! Nang chuan duh dang i lo chhar a, hmangaih dang i lo tawng ta si. Mi dang tawnah hlim takin i hun i hmang thei ta hi i lawmpui awm hle mai. Nang leh kei hian engkim tan hun ruat a awm tih kan hria a, he hun hi kan thlir pha ngai lo. Mahse a thleng a, kan hre dun ta a nih hi.
Hun a liam a, ka ngaihtuahna ata thai bovin i awm tawh ang chu tih nâka laiin rilruah ni tin i thar a, mi dang rizai i zawnpui chu thu hran fate hial i lo nei ta. Heng zawng zawng hre chung leh tuar chung hian DUHSAKNA SANG BER hlan mai loh che chu i tan tih theih dang ka nei ta lo! Anne Murray hla I Still Wish the Very Best for You hi ka rilruaah a thar tlat!
0 Comments