HETAH HIAN KA KUT THAK ################################################################### RAMHLUN VENGTHAR

May 9, 2017

Infiamna leh kei

Ka pa hi infiamna lam thila pa hawl zau lo ve tak a ni a, amah khan taste dang a nei thung a. Ka nu erawh Mizoram aiawh pawh Agra-a Basketball khel pha ngat, tlan chak tia hriat thrin a ni thung! Chutiang atang chuan kei hi ka lo sei lian ta a. JL HSS leh U Sama te in kawt mawitute zinga chhiar hmaih phalah ka inruat lo.

Football hi JLHSS bang nena one-two awihin Hruaitea, KKa, Dawnga, Bonny, Famkima, Hmingtea, etc te nen hian kan khel ve nasa thei khawp a. A puala GOLDSTAR pheikhawk ka neih pawh kha ka la theihnghilh thei lo.

Engtik kumah nge maw ni football pual hian ballboot ka nei ve a. Fabric paint-in rawng var ka hnawih chhuak vek a, High School field, Zarkawt-ah kan va inkhel ve a lawm, mi khan min hmu duh viau va, ballboot var kha la common hek lo. Kan han inkhel ta a, a diak ropui mai a, kan inkhelh zawh hmain ka boot rawng var a khawk vek!

Cricket hi gorkhali ho khan khelh an ching thin a, an zingah khan kan tel ve thin a, nuam kan ti phian. Haudala Sports dawrah cheng 500 man bat hi harsa taka ka nu hnen atanga dil chhuaha ka lei kha ka la hria a. Tin, Zarkawt Lords nena kan inkhelh tum pawh ka la theihnghilh lo. Chumi tumah chuan gorkhali ho khan team an siam a, Mizo kha kan awm nual bawk a, kan thiampuipa Mizo kha phaia awm thrin (a hming ka sawi duh lo) cricket lo hmelhriat viau thin a ni a. High School field, zarkawtah tournament an siam a, Zarkawt Lords nen min han intumtir ta a lawm. Kan vaw hmasa a, kan opener atan kan thiampuipa ngei mai kha a rawn ding chhuak. Helmet khum rawh tiin pawn atangin mi dang hovin an lo ko va, ani erawh confi tawkin 'Phaiah te pawh fast baller kan hmachhawn hnem lutuk" rawn ti ham ham. Kan han inkhel ta a, Lords lama miin a rawn vawm ngheng mai a, kan thiampuipa lo indang tleuvin ama chalah ball an head mai chu a kak chho duai mai a, a thi nasa mai lehnghal... Run 30 vel kan siam a, kan out ta vek a. Kan vawm ni a lo thleng a, kei hi wicket keeper thin ka nia, ka keeper leh a, a vawi khatna atana glove ka bunna a ni, ka khawr ang reng phian, kan han vawm ve tlauh tlauh a, min vuaksak mawlh mawlh a, vawi khat phei chu wide plus boundary te kan khilaiin ka hria!

Volleyball hi ka thiante hmingtea, famkima, bonny, dawngtluanga leh hruaite te nen kan khel ve thin bawk a. Ka sawi ka thiante hi chu an thiam hlawm em em a, kei hi ka thiam lutuk lo thung a, thianten an khelh chuan khelh ve kha ka duh ve tlat thung a. Ka san avangin a thiam lo pawl chu ka ni lo tih ka hria. Vawi khat chu JLHSS ah higher secondary sports-ah an tel ve a. School aiawh pawh an select vek tawh. Tlaiah kan inkhel lai kan zirtirtu hian min lo hmu a, a tuk maia HSS games-a tel tur chuan min thlang ve ta mauh mai pek a. AR Cinema Hall kawtah sawn kan hlap thelh a nih kha, Synod HSS kan hneh lo ta a ni!

Basketball hi Babutlang Court ka ta ti khawpa nasain Mafaka te, KC-a te nen kan khel bawk a. JLHSS kawt an chhun hnu pawh khan kan khel nasa a, A.R. sipaiho nen pawh an court-ah kan khel nasa viau bawk. Vawi khat chu kan veng khan section inelna atan a hmang a, inkhel ngai pawha ka hriat loh ho kha luhtirin substitute-ah min thut tluantir a. Ka rilru a na hle a, kan family background vang niin ka hria a, tun thleng hian ka thin a la rim! A kum lehah khelh a ni leh a, keini veng dangah kan insawn deuh chiah a, mahse section aiawh chuan tel turin min ruat hlauh thung a, tel ve turin ka kal a, section dangin an complaint ta tlat pek a, ka tel lo leh ta a ni! Kan veng thar Ramhlun Vengthar atang pawhin ka la khel zeuh zeuh a, Ramhlun North half court-ah te, Chaltlang MBSE thlangah te pawh ka inkhel ve zeuh zeuh bawk a. Kan vengah pawh half court siamin thlan tihtlakna atan ka khel ve viau thin bawk a. Branch aiawhte pawhin veng dangin vawi 2 vel chu min sawp hrep tawh bawk...


Mar 15, 2016

Logo hrang hrang CorelDraw-a siam

BAPTIST CHURCH OF MIZORAM
MIZO HMEICHHE INSUIHKHAWM PAWL
PRESBYTERIAN CHURCH OF INDIA
YOUNG MIZO ASSOCIATION

UPC (MIZORAM)
UPC (NEI)
MIZORAM PRESBYTERIAN KOHHRAN HMEICHHIA
SALVATION ARMY



Internet khawvela chen tawh hi chuan engkim mai hi kan google a ni ta mai a. Eng eng emaw khawmpui, booklet leh brochure han siam ni khua hian logo mamawhna a sang thei khawp mai a. Banner siam dawn phei chuan resolution sang leh lian han zawng ila, duh ang a vang duh phian. Thiam ang tawk tawkin mi dang tan a tangkai beiseiin Logo Coreldraw atangin ka siam a, lo hmang tangkai duh kan awm chuan a lawmawm viau turah ka ngai 

CorelDraw hi a flexible reuh a, khawih nuam ka tithar bawk nen, AI file pawhin a save mai theih bawk. Heng logo-te hi Deviant art lamah ka dah a, tah hian click mai ni se.A remchan angin kan update zel dawn nia....(A dik lo a nih chuan comment lamah min hrilh ula ka lawm hle ang...


Jul 1, 2013

Mipa, zai thiam ka tih te Part 1

Rimawi hi ngainat bik viau ka nei a, a huna zirin duh bik viau pawh ka nei thrin. Cliff, Jim leh Vince te hi ka ngaihthlak peih rengte zinga mi an ni awm e.

Cliff Richard aw dangdai tak hian ka beng zu fah tlat pek a. Thâm sin deuh hian a zai thiam a, 90's chhova TNT channel atranga ka duh tak ni tain ka hria. A movie ho kha a indawtin an rawn chhuah a, ka en zo vek lo naa The Young Ones, Summer Holiday leh Two A Penny kha ka en a, Two A Penny film-a Question tih hla phei hi chu tun thleng hian ka la duh em em reng.

Jimmy boy hi ka pa ngaihthlak thrin atranga a aw ka hriat tran a ni. Tlai dar 3 vel a ni chho va, rawngbawl paha tape-a 'Blueside of Lonesome' a ngaithla thrin kha ka mit leh bengah a cham reng thrin. Tun thleng hian a hlaah chuan ka la duh ber awm e. A aw mawi tak, a hla sak nena inrem thei tak aw nei a nih avang hian ka duh lehzual. I missed me hla ka ngaihthlakte hian tel ve tlata inhriatna ka nei thrin!

Country mipa zinga aw nalh ka tih pawl Vince Gill hi part 1 kharna atan kan hmang theks teh ang. I still believe in you hian bul tran thung ila. A aw nena he hla inhmeh lutuk hi chu an tisual emaw tih tur a ni. Ka rilrua a lan danah chuan 'A trah belh zai,' tih a ni a. Mahse, a mawi dangdai tlat. Hla tho lam aiin hla lungkuai, ti deuh riai riai a sakte hian mi a lêm zawkin ka hria. Lets make sure we kiss goodbye te hi a sak tur hliah hliah ni awm a ni a, Dolly nena I Will Always love you tih an sak hi version zawng zawnga ka duh ber a ni.


May 16, 2013

Luangliam.....

Vaivut kara an tualchaina kha meivapah chang zo vin, chumi karah chuan inkhuallemna tur an zawng ta a. Nu leh paten an thiam ang tawka thlamuan chung leh sawi thraih chungin anmahni pantute chu trih deuh reuh, hlau deuh reuhvin an melh ta a. Chu chu an khawvel a ni. Nek sawra awmte khawvel chu.

He inneksawrna khawvelah hian dinhmun derthawng zawk kan awm lo thei lo va, Siamtu min siam dan ve reng hi ni tur a nia. Pawm zama en liam mai erawh thil har tak a ni. He mi sual lulawk hmuha kan hmuh fa hmabak pawh meivapa chantir duh khawpa Sunday Sikul-a hming kan ziak ve hi chu a tikimtu ni lovin a tikiamtu kan ni hial awm e.

Thu thra tinreng min fah a, kawng dik tinreng min kawhhmuha liamah khawnge khang zo zaite kha, a hmanna lovah hian kan lo va lek nasa ta ve. Mihring hian mihring a nih hian zahawmna a nei a, mi ang lo nia kan ngaihte thleng hian mihring a nihna avangin zahawmna a keng asin. Chu zahawmna zah zo lo khawpa kan khawsa duh ta hi Mizo ka chapopuina hi zahpuiawmah ka chhuah dawnin ka hria...


Oct 26, 2012

Nghakuarium ka buaipui leh ta

(Pic 1 : A lo hnai zawk hi Guppy nu rai, a hla zawk a sen deuh hi platty/swordtail nu rai) 

 Hmanah, 1997 vel khan exam chawlh laiin Tinkle ka chhiar a, fact and figure tih vel page-ah hian GUPPY chanchin an ziak a, tui taka ka chhiar zawhah ka tho hlawt a, ka khawl bawma pawisa nawi tel lo zawng cheng 220 ka la chhuak a, tuna Khatla High School venga awm ta Discovery Aquarium dawr, chutih laia Chanmari biak in hnung, tuna ar hem hmin an zawrhna vela awmah sawn bus-in ka kal a, tank engmah nei lem lo chuan guppy 6, a pa 3 leh a nu 3, pakhat cheng 10 zelin ka va lei ve ta ngawt a....

(Pic 2: same with pic 1 description - Tunah hian no nei trep guppy nu 2 leh platty/swordtail nu pakhat an awm) 

Keima siamchawp 1X1/2 inch tank-ah chuan ka dah a, a hnuah equipment ka lei belh a, ka buaipui ta phian a, Bazaar bung hnuaia ZO HILLS tih awm thrin te, Khatla JL Cinema Hall hnuaia Coral Lagoon ah te khan ka leng deuh reng a, Coral Lagoon neitute nen phei kha chuan kan inhmelhriat thra hle a, anni kha sikulah zirtirtu hna a thawh dawn avangin a thil zawrh tihtawp a duh a, a show case tank lian zet 3X1.5ft chu cheng 1800 in ka leisak a, ka buaipui chho ta char char a, 2000 kum khan ka tank ka tih pawp avangin ka hralh leh ta mai a... kum 11 a ral hnuah ka thar thawh leh ta.

(Pic 3: Hei hi ka molly dum leh guppy nu pakhat no an ni a, 8X5.5inch-ah hetia no an neihna tur hian ka siam chawp a ni) 

Ka Nghakuarium thar chu 1ft squareX1.5 ft height leka lian a ni a, 'Nano Harmony - A home for Livebearer' tiin ka vuah a, Guppy leh molly bakah swordtail(ka chiang chiah lo va, platty pawh ang trep) ka dah khawm a..., Molly zingah - Sailfin, Golden, Black leh Lyretail ka dah a, Guppy hi cobra/leopard leh black tail an ni deuh mai awm e... Molly dum lianin no 15-20 vel a nei a, tunah main tank-ah 10 bawr an awm a, a zat hi chhiar mai a har a, lung kar leh hmun kil khawrah an biru a, pahnih ka dah hrang bawk a, Guppy no 25 vel ka la enkawl bawk a, kan chhangchhe viau... Vawi khatah no hi nei treuh mah sela, eng zat nge dam chhuakin puitling ang ka sawi maithei lo... Ka phulpui leh ta viau mai... Sangha khawi (Aquarium) hi nuam ka ti a, min tihlim a, ngaihtuahna tawt lutuk turte min tihdanglamsak a, hunawl hnawh khahna atan pawh thil thra tak niin ka hria