Zan lai thlenna atan darkar chanve vel zen zawn chauh a awm ta. Ka nau awm chuan mut reng a tum lo va, a hmel han en chuan mutchhuak hmel a pu hek lo. Chua chhapah min la rawn chhaih tak deuh deuh lehnghal. Tih dan ngaihtuah vat vat loh chuan a zawng chhang mai a hlauhawm tlat.
PC hmaah chuan thruthmun kan han rem a, karaoke chu hawngin ‘in the ghetto’ chu zanlai thleng thrakin ka han sa tak tak maia le(h)... Ka hne thei ta reng reng lo mai. Buaipui tur nei kha buaipuiawmah ka chhuak ta tlat a, chu chuan buaipui tur dang min la pe zui!
‘Ghetto’ veng
Kum dang ang lo takin ‘Masi’ chu a vawt zual bik emaw tih mai tur a ni a, chhum lei vak te pawh a kiang hlei thei meuh lo.
Tuk dang ang lo takin a vawt vin tâk mai. Chuti chung chuan kawng dung vela veivak leh teihawi mai mai tawk an la awm reng tho va, urlawk zan kham loh hmel tak tak nula leh tlangval; tumah zahpah nei lo tih hriat tak inkuah lawp lawpa kal tawk lah bo lo! Mi chi tin chi tang awmkhawmna a nih avangin hmun hulum, ‘Tinreng awmna hmun,’ tia hming lem an phuah pawh chu a inhmeh phian.
An thawm a rin em avang chuan an kianga in rawp tawh tak chhunga nausen piang thawm chu tumah rengin an hre lo.
Naute khawngaihthlak
A fapaina ni ngeia a hriat, a puh lah chu a pha fithla thrak a. Tihtlakna turin sum pakhat mah a nei lo. Chhungte han pur tur a nei bawk si lo. Inenkawlna tur sum chu sawi loh ama hrawk pawh a chawm zawh hram hram laia nausen duhawm lutuk a han hring ta maite chuan a hnuk a tiulh a. Engtin nge a enkawl chhunzawm tak ang le?
Pindan chep leh rimchhe zetah chuan amahin a inbuaipui a, thlasik khawvawt hnuaia tuam lumna tur puan a neih loh avangin a kawrlum chuan a naute chu a tuam khawr trat a. Thlamuang tih hriat taka a nu trang bel nausen chuan eng nge a eiin a in ve ang?
Khaw’nge far khat tal....
He harsatna hriatthiampui tur hian a chhunga cheng kher nih a ngai zu nia. Pawn atranga hmuh phak loh chhunglamin a tawrhna hi na tak, thihpui tham a tling mai awm e a!
Hemite nufa ai hian kohhran leh khawtlanga tlaktlum loh hlauva phar buai an tam zawk a. Mahni nawmsakna thlalela um an tam zawk. Han ngaihtuah chiang ila ~ hetiang naupang hi engtikah emaw chuan khawtlang leh kohhran tana mi hnawksak a la ni ngei ang tih a chhui zui theih asin. Tranpuitu a mamawh a ni. Nang leh kei erawh kan mit tihdelsak kan ni miau va, a ni lo lamah kan meng hlauh si. Tranpuitu a mamawh lai takin khawvel chuan a hnuchhawn ta..
Tichuan...
Engtin tin emaw a rawn thrang chho ve naw naw a, naupang dangte ang bawka harh leh luhlul a ni. Eitur petu a neih loh avanga zan rei tak tak a vahna kete chu silfai a ni chuang lo va, a mutna puan atan fai a ngai lo.
Thing delh loh lung delh loh na na na chu tlangval hmel a rawn hmu ve ta reng a, a thranhnan kut hnathawh nachang hriat loh chu midangte tan vanduaina thlentu a ni. Ei leh in, silh leh fen a mamawh ve tho avangin engtin nge a neih tak ang? Te lua awm lovin a hmuh ang ang a ru a, a chemte neih chuan mi tam tak a vau zawm bawk. Khawtlang tana hnawksak a ni ang tih ngaihtuah duh lote kha a tuartuah an trang ta fo mai.
Chhiatna chu...
Urlawk zan a ni a, khua a vawt kher mai. Zan dang zawng aia thilsual tih nana duhawm hmel a pu tlat! Chu chu hriaiin kan tlangvala pawh chu a awmna hmun atrang chuan an rawn chhuak thuai a. Kawnga motor inhung chu ru-in midang a han rikrap leh dawn a, a kianga khawtlang hruaitu lo duty-te chuan an rawn nangching hman hlauh. An zinga kut rang zual pakhat chuan dimna tel miah lovin a luah a hlap ta thruai mai a. Tlangvala chu thihna kotlangah a tawlhthlu ta! A nu’n a hmuh chuan ring takin a trap rawih rawih a.
An kianga in trawp taka naute duhawm tak lo piang, hmabak thim tak avanga nu pakhat trap pawh chu a hliah khuh hial a ni.
18th November, 2007
0 Comments