PA MIT

Football khel tura practice ve dangte chu lian pui pui, chak hmel tak tak an ni hlawm a, an practice apiang chuan a theihna zawng zawng sawmin football chu a khel ve thrin tak naa an hliah bo vek thrin! A têt bik em avang chuan infiamna hmunah pawh thrahnemngaih bik a ngai tih a intheihnghilh ngai lo.
Substitue thrutna chu atana siam emaw tih mai turin inkhelhpui a thlen apiang hian a luah ve ziah. He tlangvala hi a pa nen chauhva khawsa an ni a, an inkungkaihna thukzia chu sawi phak pawh a ni lo. A fapa chu thrutnaah thru tluan ziah mah se a tranpuite lo au phur chuan khelmual kotlang a lo mawi ve ziah a, a fapate team inkhel chu vawikhawt mah a la hmaih lo.

High Sikul a kai pawh chuan an class-ah a te ber a, chu chu hriain a pa, a neihchhun chuan ni tin a fuih sauh sauh thrin. A duh phawt chuan football chu bansan turten a han hrilh ve thrin a, a fapa erawh chuan a tuichilh tlat thung. Senior a nih hunah chuan ala khelh theih ve mai ringin thrahnemngai takin a practice tlauh tlauh a.
High sikul a kai chhung zawng hian game khat mah a hlah lo va, practice vawi khat mah a thrulh lo bawk. Mahse, kum eng emaw zah thrutthlengah a thru a nih chu! A pa erawh chuan rinawm takin a la fuih zui zel a.
Collerge a rawn rap a, a chin thran bawk leh a tuina football-ah chuan a tha leh zung, ngaihtuahna a seng leh nasa hle a. Midang erawh chuan amahah beiseina an neih loh laiin ani erawh chuan beiseina sang tak nen a la practice reng tho. An coach pawh chuan a taihmakna leh inpekna avang chuan team-ah a hming a ziahluh sak ta nge nge a. Hetih rual hian a teammate-te erawh chu an hnual hle thung.
Team list a rawn chhuak a, a hming tarlan a han ni ve ta chu a lawm kher mai! Hmanhmawh takin biakhlatna awmna hmun chu a pan a, a pa a hrilh thuai a, a pa chuan season khat chhung an khelh apiang en theihna ticket a lo lei nghal bawk.
High Sikul nen khan danglamna engmah amahah chuan rawn thleng a awm chuang lo. Kum li ngawt substitute bench-ah a thru leh ta! College senior season tawp pawh chu a lo hnai leh ta reng mai, ani pawh chu nasa lehzualin a inpuahchah ve a. Chutihlai tak chuan an coach chuan a lam panin lehkha hi a rawn keng va va a.
Lehkhaah chuan a pa thih thu a lo inziak a. A hrawka chil lem harsa ti tak chung chuan, “Coach, tukin khan ka pa a boral a, vawiin practice hi thrulh ta ila a pawi viau ang em?” Coach chuan a darah vuanin, “Bawiha, tunkar chu chawl rawh. Inrinni-a kan final khelh tur pawh rawn ngaihtuah buai duh suh,” tiin a chhang a.
Inrinni a lo thleng a, an inkhel chu an tluang lo hle a, lehlam pawl lakah si 10 ngawtin an hnufual lehnghal. Tlangvala chu ngawi rengin locker room-ah a lut a, a thuam famkim nen khelmual chhung chu a rawn rap ta a. Coach chuan mak a ti kher mai. “Coach khawngaihin min lo khelhtir ve hram teh, vawiin chiah,” tiin an coach chu ngenngawl takin a hrilh a. An game chhiat dan atrang chuan an chak dawn chuanga a hriat loh avangin tlangvala luh chu a remti ta!
“Aw le, number 22 kha lut rawh se.” A team-te chuan mak an ti lutuk tlat, chumai a la ni hleinem, anmahni trantute phei chu an hawihai nasa asin. Vawikhatmah inkhela la lut ve ngai lo khan khelmual chhung a rawn lut miau a ni.
Inkhelh chu an han tran leh a, tlangvala truan chu a lo thra reuh phian a, mi karah a pit ta zeuh zeuh mai, second 10 chiah a awm tawh tihah chuan chakna touchdown a rawn nei ta a nih chu!
Locker room-ah chuan a team puite chu hlim takin an ri chel chul a, ani erawh kil khatah a thawmhnaw thlakin a lo thru malh malh thung. An coach chuan rawn panin, “Bawiha, engtin nge khatiang khan i tih theih a?” a rawn ti a. Tlangvala chuan coach mit taka en chung chuan, “Enteh, ka pa a thi tih i hria ti raw. Ka pa kha mitdel a ni tih erawh i hre kher lovang. Kan team inkhelh apiang khan phur takin a lo au ve ziah a, vawiin atrang chauh khan ka pa’n min hmu thei dawn tih ka hria a, ka theihtawp ka chhuah a ni,” tiin a chhang a.