Danglamna Siamtu: Nangmah

Tunlaia thumal kan vawrh lar thar em em chu, 'CHANGE' tih hi a ni. Political platform atranga pulpit tlang thlenga kan sawi tak avang hian a ropui ta viau pawh a ni lo va, kan hriat thran em em trawng dang hmanga a rawn lar tak hluai avanga ngaisang thar ta thut kan tam zawk niin a lang. He thumal hi change in 'Danglamna' tlangah i lawn zawk teh ang! Engvangin nge kan danglam ang a khawiah nge danglam a ngaih a, danglamna hi tu siam tur nge tihte hian ngaih pawimawh hlawh se hetiang hi kan dinhmun a ni ang em? Danglamna duhin miten ngaihtuahna nasa tak sengin thil an lo ti a, chan an huam a, hlep an ngam avangin danglamna rah an hmu a, an tel thrin. He kum thar atan hian danglamna duhin beiseina nen min thlir a, danglamna siam tur chuan eng angin nge i lo inbuatsaih ve le?

Danglamna chu

Kalphung ngai ti tlut chi kan awm, kan tam bawk. Zep thu a cheng lo. Khawtlang roreltute zingah leh Kohhrana thuneitute zingah an tam. Mahse danglamna siam ngam khawpa dawih ngam leh huai ngam kan tlem leh thung si a ni. Chutih rual chuan danglamna chuan kalphung ngai thra nia kan hriatte erawh tichhe suh se. Mi hmai eng kan zah lutuk avangin danglamna kan siam ngam lo a ni thei. Mi hmai sa kan tawn ngam loh avangin danglamna kan siam ngam lo a ni thei a, thren leh rual kan ngah avangin danglamna kan hlen ngam lo a ni thei a, mi hmuha mawi loh hlauh luat avangin emaw, khawi pawl leh kohhrana kan tlaktlum loh hlauh luatah danglamna ngawih bopui kan awm treuh pawh a ni thei.

Kan mamawh danglamna

Han hawi la, han thlir vel teh. Kan khawtlang nun chhe mek te hi hmuh threlh luih tralh theih pawh a ni tawh lo. Mimalin a tran loh avangin chhungkuain zawmna chang a hre lo va, khawtlangah a kangkai ta a ni em? Zirtirna thra taka chawm len nia kan hriatten ram min hruai pawhin heti hi kan thleng a ni ta. Engvangin nge danglam hi kan mamawh loh tehlul ang le? Danglam kan mamawh a, kan ngai ngawih ngawih tawh chu a nih hi.
Khawi atrangin
I pen khat atrang khan he danglamna hi siam rawh. I kut vai khat a tawk a, i chil per khat a tawk a, i ka vawi khat i an khan danglamna mak thra leh duhawm a siam thei.

Tu siam tur nge

Nang i ni emaw, kei ka ni emaw kan danglam hi a hun a ni. Hun inher danglamtir aiin a hun lo thlena kan danglam a hun tawh. Engah nge i thrutna ngaia i thrut a, i vawnna ngai i vawn a, i sawi ngai kha i la auhpui luih tlat? Danglam a hunah chuan tlawm ngam la, hmasawnna ke pen ngam khawpa kan intih paukhauh a ngai tawh a ni. Nangmah-ah tran la, in chhungkuaah thlen la, khawtlang leh kohhran hi nghawr rawh se.
Kum a thar a, i danglam a ngai tih hria la, kumin atan chuan thra, fing, fel leh tling nia i lo inngaihnate kha a tawk tawh lo tih inpawm rawh. Tunlaina erawh chu a chhe zawng ni lovin hman trangkai dan ngaihtuah la, danglam ang che.