Mi Rethei Thleng Phak Lo FESTIVAL

Hnam hrang hrangin Kût/Festival emaw an nei deuh threuh va, hnam ropui leh upa apiangin an ngah emaw tih mai tur a ni. Arts festivalComedy festival, Cultural festival, Folk festival,Celebration festival etc a tam mai a. Mizote pawhin eng emaw zah kan nei a, heng: Mim Kut, Pawl Kut leh Chapchar Kut te hi a lar zual a ni mai awm e. Khang kan kut hlu tak takte kha Kristianna danglam takin a rawn ti bo va, Mizo nuna thil pawimawh a rawn thai chhia a ni.

Khang kutte khan Mirethei leh hausa ang khatin a hrut rual a, hmeithai leh lal lungrual takin a lamtir thei a ni. Kohhran khirh hunlaia Missionary kan nang a, sap kan lo ngaisang laklawh bawk si a, an thu kha a kawi a ngilin kan zawm a, zu nena kal kawp tlata ngaih leh Kristianna nena intu lo deuh an hmuh leh hriatte chu an thriat zel a. Culture mumal sawi tur nei lo rak khawpin min siksawi a. Hetiang hi kan lo thleng ta a ni mai awm e.

Kristian kan nih tak avangin kan tihtur chinah ramri a inkham ruah mai a, kan tim deuh dui a nih kha. Hun a lokal zel a, kut kan hmang ta lo va, kan hriat ngai lo Lal Isua chanchinin min chilh hneh em avangin PIANGTHAR kan lo ni a, KRISTIAN kan lo nih takah chuan A pian atranga A thawh leh thleng kan lawmsak a, kan sunpui a lo trul ta zawk a ni.

Hetianga Mizo sulhnu leh culture a riral mai tur hi ngai ngam lovin tunlai mil thei ang ber tura CHAPCHAR KUT hman a lo ni leh a, Kan inncheinate chu 'Modern Chapchar Kut' tih takah changkang tak a ni a, a threnin 'Puan chei' atana an hmante chu hmeichhe kekawr tlang cheina atante an rawn hmang a, shawl atante pawh an rawn hmang thul. Hetia sawi tak avang hian Mizo mipa zawng zawngin kekawrtê ha lova he KUTa kal vek tur tihna erawh a ni chuang lo! Chapchar kutte chuan a huap zau va, Mi zawng zawng kan len vek avang leh kan hmanna hmunin a zir em avangin chhimtu pawh an thrahnem thei khawp mai. Official Box-ah chuan a maka maka tam an inek beng a, threnkhat chu mawi uchuak khawpa rawn inchei, hmuh hrehawm khawpa tâite an ni hlawm a, threnkhat sawi dan chuan Heng official chin, mipaho kawr hak; THANGCHHUAH KAWR an tih ang hi a thlawnin an dawng thrin a ni awm e.

Ka sawi duh tak zawka chu Festival phuahchawp - ANTHURIUM leh BAMBOO FESTIVAL hi a ni. Ka hriat chinah trum 3/4 vel Anthurium Fest hi kan hmang tawh a. Bamboo Fest hi vawi 2 kan hmang tawh bawk. Heng atan hian sum tam tham tak hman thrin a ni a, threnkhat hi central atranga lokal a ni awm e(?) Anthurium Fest hi Mizorama Anthurium chingtute tih hmasawnna atana buatsaih ni awm tak a ni a, anthurium promote nana tih a ni awm e. Reiek Tourist Resort-a hman thrin a ni a, Aizawl atranga km20 vela hla a ni. Heti a nih chuan a kal thei awm tawk chu hriat chian sa a ni a. Mi rethei thleng phak lo Festival a ni.

Bamboo Festival a awm leh a, vawi hnih kan hmang tawh a, hei pawh hi khu lam atranga sum rawn kal a ni leh awm e (?) Mau hmanga thil siam leh ilo pho chhuahna hun atana hman tur niawm tak a nih laiin Grape Wine hralh a kal ber! Kum hnih chu Beraw Tlang-ah neih a ni leh a, Aizawl atranga a hlat zawng chiah hi ka hre lo nain Km10 a tling maithei. Hetiang hi a nih avang leh a hmun thleng, City Bus a tlan loh avangin mipui vantlang hnuailam mi rethei zawkte tan chuan he festival hi chhim theih a ni lo.

Mizoten intihhlimna dang kan mamawh kan tia, kan iak kan iak laiin Festival siamchawp chi hnih kan han nei thrawt a, amaherawhchu mi hrawl leh awmtheite tana siam a ni mah awm e. He ram hian hmabak ropui a nei lo, a hmabak Thralai-te tuihalna phuhruk tur hian eng ang takin thawk zel dawn maw? Chapchar Kut lo thleng hian ngaihtuahna thar min siamsak se thil duhawm tawp a ni.