Mangthra nan fawh khat

Ka thil tih tura zawngah chuan hei tluka huphurh hi ka nei tawh kher awm lo ve. Thlasik rim a nam tawh a, Khuangchawi thla tawp lam a ni. Kan innghahna hmun tura kan tiam chu darkar chanve zen zawna hmain ka thleng a. He hmun hi ka chulnel tak a ni chungin tun trum zet zawng min lêm mawlh lo. Vawi tam tak hetah hian kan inhmu tawh a, ni tin chu ni chiah lo mahse chutiang deuh thaw tal chu a ni ve ang. Inthlahlel taka hma lam hun thlir chunga biahthu tinreng kan infahna hmunah ngei chuan ‘A tawpna tur,’ tiin kan inhrilh tak a nih kha! Dar nga a pel tawh a, mahni hna thawhna lam atranga hmanhmawh taka ka haw hun a ni tawh. Rinai takin khua chu a vawt chak a, ka inrin lawkna kawrlum chu ka la chhuak a, ka han inthawlh nghal vat a.


Ka rim hriat thran tak chuan ka ngaihtuahna chu a ti dang ta vek a, chhunglama hriattirna ka dawn fo ang kha ka dawng leh tlat. Min hnaihtu an awm a ni. Hawi let tuma ka insiam lai chuan ka hma a rawn thleng ti tih tawh a. Inhmachhawna kan din meuh chuan ka huaisenna in a tlin lo leh ti tih dawn ta mai!

Inti pachang tak hian, “Thru la,” ka han ti ngawt a. “Thrut kher eng nge a ngaih na.” Ka thinrim thut chuan a banah ka chelh a, ka pawt thru hnawk a. A hmaah chuan dingin ka aw ka han thian te te a. “Vawiina helai hmuna ka sawmna che hi sawi tur tam tak ka neih vang a ni. Ka sawi zawh hma erawh chuan min pawhchahsak lo la ka duh a. Ka sawi hreh tak tak leh ngaihthlak atana nuam lo tak tak ka sawi a trul dawn a ni. Vawi tam tak hetah hian kan inhmu tawh a, khangte kha thil dik lo vek a lo ni tih hian bul ka tran teh ang.

Vawiin atrang chuan kan inhmuh a rem tawh dawn lo.” Ka aw chu hnawhtu awm ang mai a ni a. Ani lah chuan hnuai lam a melh reng a. Duat taka a sam ka chulsak thrin chuan a hmai chu a inhliah a. Ka ke rawn fartu chu a mittui a ni tih pawh ka hai hauh lo. “Khawngaihin min en teh.” A mittui tla thup tum tak chung chuan hreh zet hian min en a. Ni tla tawh, kawl engah chuan a mittui parawl kiang pawh chu hmuh hmaih luih theih a ni lo. A hmui khur der der chu duh thawh taka ka fawh thrin kha a ni a. A mawi ngaiin a la mawi reng a, beidawn hmel deuhva a âng deuh phiau phei chu, “Ka tifiam a nih kha,” tih leh mai ka duh!

“Trap lo hram teh, hmuh i hrehawm tlat! I hriat angin he thil hi ka tih a ngai a ni. Engtikah nge ka theihnghilh ang che tiin ka ngaihtuah a, ka lungphuten min chawlhsan hma chuan ka theihnghilh tawh ngai lovang che. Chumi avang erawh chuan rawn hawi kir tum lo hram ang che.

Ni a liam ang a, khua reiin min hnem mai ang tihte chu dawt a ni dawn. Ka theihnghilh theih dawn loh che ang bawkin khua rei hian min hnem dawn lo tih ka hre chiang a ni. Mahse ka tih a ngai a, min phuartu keimaha a awm tih i hria a lawm. Nang chu nula, nulaah pawh duhawm berte zinga chhiar hmaih theih loh i ni a, i tan chuan khawvelah hmabak tam tak a la awm a. Kei aia thra pawh i la hmu ngei ang tih ka hria a ni.” Ka hnuk a pawt tran tawh a. Ka aw pawh a ri chhuak lo lek lek tawh. “Tuna hrehawm i tihna hian a kiansan leh thuai ang che a. Kei erawh a intran dawn chauh.” Min en ha mai a. Trah tum hmel pawh a pu tawh lo. “Vawi khat chauh ka fawp nang che inmangthra nan...” Ka insum zo lo chu ka mit deuh sulhin ka hria a. Ka piah atrang chuan, “I thlenna a va rei tawh awm ve,” a rawn ti a. Ka mi nghah ngei mai chu! Ka hmabak hlen tur chu ka huphurh kher mai!