Hlui thei lo Krismas

Thlasik khua a nih tawh avangin boruak a ro thawkhat hle tawh a. Kawngpui kam kawtzawl chu a khu tha kher mai. Vaivut khu kara rawn lang mipa naupang rual chuan football an pet a ni tih hriat tak hian ball lir chu an um laih laih a. Kan dinna chu bual in nena insi lek lek a ni a, bual in chhuat chu mau hmanga phah chhuah dap a ni. Inbual emaw insil emaw an awm a ni tih hriat tak hian mau kar atang chuan tui hi a rawn baw leh hak thin. Vawi leh khatah naupang a rawn te tuarh a. “I nawt na, a na lutuk, a tawk tawh.” A aia ring zawk hian nu chang aw hian, “Vaivutah inkhel tawh suh ka ti che a ni lawm ni, engah nge i inkhelh leh thin. Dawh rawh, dawh ringawt rawh. I intihbalh leh ngat chuan Krimas kawr ka lei lovang che.” a ti a. Chat avanga ka nuin min nawhna kha a lo liam va ta duai mai a, he hun hi zawng a hlui thei mawlh lo!

Aw Krimas

Hun leh kumin a tih danglam theih loh nun hi nei ila eng hi nge nuam ang aw tih hi ngaihtuahna tibuaitu a ni. Huna zira danglamna hi keimahnia awm ve a ni a. He hun lawmawm mi tin tana siamah hian danglam loh han tum thin mah ila eng emaw hi chuan min mawlh leh tlat zel!
Lungleng mite tana hun duhawm hi tawmpui loh tum pawh hian keini meuh pawh kan tui lo chauh zel a. Ral khata mas hla ri chiai chiai han ngaihthlak a, zan reh lama nula tlangval thla eng lawma mas hla han sate hian ngaihtuahna hi a ti bethlehem loh pawhin a ti buai ve map thei zu nia.
Khawi hmunah pawh, eng tlangah pawh, eng ruamah pawh awm ila he hun hi a hlui thei lo, a thar leh thin tih hi chu kan hria a lawm. Boruak a inthlak a, mahni khaw ngaih a na ringawt a, thiante kan mitthla nghal a, chhungte min boralsan tawhte kan ngaihtuah leh thin. Chutih hunah chuan krismas kan lo hnaih tawh fu zel a lo ni!
Vaivut virus

Kum tluanin thununna hnuaia zirnain kan bel a, kum tawp result a chhuak a, vanneihthlak takin pawl sawn theih hialna khawp thiamna kan lo nei hlauh va. Chu pawl sawn kan sawn theih hun an puan ni leh sikul chawlh inzawm chu kan nghahhlelh ber a ni.
Naupang harh tia sawi tur chu ka ni hauh lova vaivut virus kai pha chin kha chu ka ni ve chiang! Hmun thenkhatah kan rualpuiten sephung an laih laiin Hot-Wheels kan chai tawh a, He-Man kha kan hum tawh. In sa turin an leivung paih leh an balu dah khawm kha kan chhinchhiah rang thei fu. Kan hunawl neih lai hi thlasik a lo ni kher nge ni vaivut leh chat hi a inzawm tlat a. Chat lutuk tak mai nuten min han nawhsak ngat kha chu na thei tak a ni.

Danglamna

Tunlai naupang chu an bal duh tawh mang tlat lo va, intibalte pawh mahnia intihfai nachang an hre zel tawh a, chat kan khât ta pharh mai. Khatih laia kan hmui repte kha zahpuiawm khawpin a khir a, zahpui a hnekin thian zinga hmui rep loh kha a zahthlak lek lek zawk! Hnap a tawlh a, banin kan han hru a, banah a khir a, biangah a cham bang a khir bawk a, hmui chauh kha a rep lo va, biangte kha a sen tai tek a, a sen dan kha duhawm lam a pawl hauh lo. A chat a ni! Tunah te chuan hmui rep hman pawh kan awm tawh meuh lo. Mahse heng zawng zawng hi hmun thenkhatah chuan a hlui thei tlat lo. Lung a leng a ni!

Krimas bazaar

Kum tluana kan nghahhlelh kan hunpui Krismas atan engkim hi kan ur a, engkim hi kan ngaihtuah! Kum bul kan tan a, kan tawpna pawh a ni mai em aw tih theih a ni. Engkim kha ‘Masi hunah’ ti tila a fel vek a, a sam et mai bawk a nih hi. He krismas atana nu leh pate intuakna zozai hi a tam tawh ngawt ang le. Krimas kawr mawi lei turin bazaar-ah chhungkuain kan intuk khawm a. Mi an lo tam tawh ropui mai si a, a ni lo lama kal hlauh avangin nute pawnfen-ah kan pawt tung tung a. Kan in tira mei kai kha a ni zel a. Kan duhzawng leh awh zawng kan hmu a, kan han pawt her lawih a, kan lut dial zel kha a nia. Bazaar-ah va kal ila, kan tih dan ang chiah khan an lo ti ve leh tho va, danglam tam tak kara chat, krismas bazaar leh boruak ro kara vaivut hi chu he hunah hian zawng a hlui tak tak thei lo ve.