Ningzu aiah Siktui

In tura siam a nia, lu a tihai thei a, thil reng reng hi min ti ngam a, zahpah hriat lohna a siam a, mipat hmeichhiatna kawnga kal a duh a, chu chu zu a ni. A tawp ngawt lo va, a tawk ngawt lo. Sawi belh tur tam tak a la awm ngei ang. Zu chungchang hi a tha lam emaw a chhe lam emaw sawi turah ka indah ngai lo. Zan reia zu han inchhawp a, tuia chantir leh tura Isua han auh ngawt pawh chu a dik chiah lo. Ka hmaa zai chu a thinlungin a zai a, a tak ram a dai a, a aw zun zamin a fan chhuah hmeichhia a nei a, zu zungzamin a taksa a fan ta zawk a. He hringnun indona khawvelah hian hnehtute an dingchang zel a ni tih hretu nang leh kei hian indona hi engzah nge maw kan lo hmachhawn ve tawh a, engzah nge kan hneh tawh le?


Zu no chawi hmasak ber leh zu no dawm hnuhnun ber inkar rei zawng inang lo hian chhungkua, khawtlang, kohhran leh ram tan harsatna a lo va siam nasa thei tak em! Chhin hi chhan nei lem lova chhunzawm chuan chhuata tluk hnawk thleng min chenchilh thei asin.

Mahni thunun theih loh khawp taksaah hnathawktu an awm hian hrehawm ti ber chu a tuartu a ni thei a, a kianga mite an ni thei bawk. Thinrimna te, chakna te, awhna te a lo thleng a, chu chuan indona mualah kan duh emaw duh lo emaw min hnuk lut a, rilrua chhia leh tha hriatna awmten tha a hria a, chhia a thliar thei. Chuti chung chuan tha zawka kan ngaih kan pan hian min tichhe ta si a ni.

“Kha no khat,” tih leh sarang ri ringawt pawh hnar thei tawh lo khawpa taksa thunun thei lo indona muala ding kan ni! Thiante zinga danglam chakna avang te, nun khawhar ngawih ngawihna avang te, nuam taka khawsak duhten ruih tur kan hmuh hian ‘huai tak a’ tih a theih ngawt loh a, hmangaihtu mit atang chuan na tak a ni.

So many times I've hurt the ones I love....

Rui pawr phing phengin in kan thleng a. Nupui fanaute nena khawsate tan an innghahna ber chutia kan han awm ta chu fate pawhin mak melhin min melh a. Chhungte leh unauten pawi tih hmel takin min lo thlir a. Thinrimna tur han zawng ngawt ila dik chiah bawk si lo, chaw han ei dawn ila lu a hai bawk si, inbual dawn ila ruih a reh hlau bawk si, mut mai loh chu tih theih a awm lo. Mut hnuah kan la mu vir zui, luhai nak a laiin kan tan min han tawngtaisak a. Chu chu kan zan tin nun hman dan a ni.

Chhungkuaa chenpuite tana hrehawm ber chu hnawksak kan nihna leh hmangaih kan nihna inkawp tlat hi a ni. Hnar chakawm khawpin hnawksak mah ila hmangangaihna avanga suih khawm kan nih miau avangin hnar theih kan ni lo va, chhungkaw nih hlutna leh nawmna hi chu mi sual ber pawhin a hria a ni.

Chhungkaw nun nuam tak thin, chhung inkhawm pawh duh ang taka hmang thei kha keimah vangin duh hunah pawh an hmang thei ta lo va, keimah avangin ka chhungte nui hmel ka hmu khât ta khawp mai.

To-night I'm as low as any man can go...

Chhungkaw tana hnawksak kan nihna piah lamah khawtlang leh kohhran tan pawh chai thama lian kan lo ni ta reng mai. Chu chu zu no khat atanga intan a ni. A khamphei zawnga haw chang ka ngah a, bawkvak chunga in thlen changte pawh ka nei. Eng emaw hlekah nuihzat kan hlawh a, fiamthu thawh nan min hmang tawk an lo awm a, zing tawngtai inkhawmah meuh kan hming lamin an tawngtai zu nia! Chu pawh duhtawk ta lo chuan inrinni zanah te pawh an la pu lut ta zel a, danglamna nun ka neih ve theihna tura min dilsaktute chu peih ka ti kher mai.

Mahnia han awm reuh reuh chang hi chuan nun khawhar riauna hi chu a awm ve ngei a lawm. Chhunglam hian mamawh a nei a, pawn lamin mamawh lakna tura chakna a nei lo va, lakna tur hmun a hre tawh lo. Hetih hunah hian chhung ril hi mahniin a rum a, inhnemna pakhat chauh a awm ZU bawk chu!

Hneh theih loh nun neitute awhawm zia hre tur hian hneha awm rengte zawh hi thil tihawm a lo nih ber hi. Mihring ve lemin kan duha kan siam bawiha han awm tak hlauh chu tiin ngaihtuahna te pawh a insawr bing ve thin a. Danglama kan awm theihna tura vawi tam tak tawngtaisak kan nihna te chuan chhan a hlawh mai loh avangin thil mak thlen hun hi nghah chi a ni lo tih hrechhuak rual kan ni.

ZU no dawm ka duh tawh lo. Ka tuang ka ti chhah lui a, ka theihna zawng zawng ka sawm khawm a, zu nghei tur chuan ka insang phek a ni. Tum chuan kawng a awm an tih tak kha. Tlai lam a lo ni a, ka mittui chu a tla zawih zawih a, zu chuan ka taksa a rawn thawng phu ta zeuh zeuh mai! Ka tiril mai a khur tawh lo va, lang theiin ka khur ta. Vawi tam tak hrehawm ti tak leh mualpho taka min siamtu, ka chhungte nena inngeih lo taka min dahtu zu hi ka hua a, in ka duh tawh lo. Indona hrehawm ber chu a va ni tehlul!

I pray that one more is not too much to ask...

Ka tana an tawngtaina zozaite ka ngaihtuah chhuak a, ‘Vawi khat chu dil ve ila, Lalpa hian a nin phah em lovang chu,’ tiin inthlahrung tak chung chuan ka thingthi rawp a... “He indona hi hneh tumin ka bei a, Lalpa i tel lo chuan hneh thei dinhmunah ka ding lo tih i hria e.’

Taksa chuan zu chakna a ngah tawlh tawlh a, thlan tui leh hnap tui nen kan kawi ngiai nguai tawh. No khat chu lem hlek ila chuan ka dam sawng sawng dawn tih pawh ka hria. Mahse indona hi ka hneh a ngai a ni. Hnehtu dinhmunah tunah hian ka din ve a hun tawh.

Keimah mai chuan ka thei lo tih ka hria a, ka taksa khur nasa tak chung chuan ka bawk thlawp a, “Lalpa, tih theih ka nei ta lo, ka taksain a mamawh zia i hriat kha. He indonaah hian hnehtu nihna luah ka duh a ni... Hmanah Kana khuaa tui Wine-a i chantir ang khan tunah Lalpa ka hmaa Wine hi tuiah chantir leh rawh...,” tiin ka au ta vak a....

Ka harh ta zawk a, ka bula tui vawt ka inchhawp chu novah thliin kan lem khalh a. Zan rei tawh takah chuan Graham Brown-an amah a inphuahna hla chu kham lo takin ka ngaithla tha leh a.

He indona mualah hian engtin nge hnehtu ka nih theih ang tih chu ka inzawt neuh neuh va, Hneh ni lova hnehtu dinhmuna min dintir theitu chu pahnih chauh an awm tih ka hrechhuak ta! Lalpa leh keimah!