Krismas Hnawk

Ral khatah Krismas theihnghilh hlau taka "Aw Krismas ka damchhungin ka nghilh lo'ng che," ti lawm lawm carol thawm ni awm tak ka hre vau vau va. Aw.., Krismas theihnghilh inrin tlatna thlarauvin a man ta hlawm a ni ta ve ang chu maw tiin ka ngaihtuah zui a. Hunin a ken leh a herchhuahpui hi theihnghilh sawmsarih mahila min thawng thotu tur chu hun vek hi a ni. A phuahtu hian ~ Aw Krismas ka at hlauh loh chuan ka damchhungin ka theihnghilh che ka ring lo," ti zawk tur zu nia. A uar ta mah mah a ni! A châng dawt chiah ka ngaihtuah pha lo!
Krimas a rik rual hian Santa Clause vur kara phur taka van zan zan ka mitthla thin a. Chinchang ka lo hre deuh va, Masi rik rualin kawr thar, toys thar, ruaitheh te chu ka rilruah a rawn lang nghal. Bethlehem bawiha ka tan chinah Krismas leh Bethlehem mitthlaah a cham a, khawchhak mi fing, berampu, hmar arsi, ran chaw pekna thlenga nausen mu, Mari leh Josefa te lo chu rilruah a leng lo. Krismas-ah chuan dawhthlak ngei ngei tur kha a ni tawp a. Chinchang kan lo hre deuh va, kan lo hawiharh takah chuan 'Khawiah nge ka hman ang,' tih chu min kamtu lian ber a ni thrin.

Krismas kan ngaihdan hi thlak danglam tum hmasak lohva a thianghlim leh felfai zawka hman inzirtir hi a fu lo a ni.
A hun a thleng dawn a, a hman dan turah nu leh pa, nula leh tlangval piah lamah a meizang hlaptu Kohhran pawh hi kan buai hmasa a, chinfel tur kan ngah hle. Kan hmang zo va, kum thara hman dan turah kan buai leh bawk.
Kohhran thalaiin Krismas a hnai tih an hria a, an rilrua lang hmasa pawl chu khawi lai mual rem lai deuhvah emaw inhawt buk a ni. Sorkar pawh a bang bik lo, hunpui thianghlim leh tha zawka hman dan tur a ngaihtuah dan chu mi huikhawm a, cheng nuai eng emaw zah hman ral a hla hmanga awih a ni mai! A bak kan ngaihtuah pha lo va, kan ngaihtuah thleng lo. Hetiang kawngah hian YMA hi a fakawm letling thin ngawt mai.
Krismas hi thilpeka bul tan a ni a. Chumi chu kan missionary hmasate pawh khan kan thinlunga min tuhsak hmasa lovin Krismas Tree leh Santa Clause min vulh lensak zawk a. Kum tira ta kan ur dan leh kan hmuah dan dik lo hi kan nu leh paten kan thinlunga an tuh dan a ni. Engkim mai kha, 'Masi-ah kan lei ang,' tih a nih miau avangin Masi chu thil leina hunah kan ngai mai!
Thilpek aiin mahni invurna hunah kan hmang a, mahni intuituahna hunah kan hmang. Krimas awmzia hi a bul atanga kan zir that leh chu a va tul tehlul em. Midang tan far khat tal kuminah hian kan far a tul a ni.