Wavin Flag

Rome aia ropui leh chak nia inngai lal awpna hnuai piang ka ni a. Kan khua chu ka tan chuan ka lei vanram a ni. Kawtthlerte chu duh tawka kan lim lamna hmun a ni a, kan tualchaina ber a ni. Tu dang kan ngai lo va, tumah kan awt hek lo. Mipui an thuhmun fo thei lo tih chu a takin ka hmu ta. Tualchhunga buaina a chhuak a, a punlun zel a, rawlrala chetna a nasa a, ram inrelbawl danah duh khawp lohna a lo chhuak a. Tumah awt ngai lo khan te tham pawh awm lo va awt vek khawpin min sawp rethei ta!


Ka pian, ka seilenna chu loh theih lo va chhuahsan a tul ta a, chutah pawh chuan hrehawm tinreng nen bul tan that a ngai a, nun khaw chhuah nan chuan beih tak têa beih a ngai. Kawtthlera ka zirchhuah tam tak zingah mi dangte aia dawihzep nun neih a thiang lo va, ei tur neihna tur a nih phawt chuan tih hreh loh neih a ngai. Chuti chung chuan zalenna zawngin rilru a vai ruai a, zalenna zawngin ngaihtuahna a vak kual nasa thei hle. tih theih dang awm hek lo le, a nghahah kan tlak tawp mai a ni. Dawhthei taka chu ni lo thlen hun chu nghakin kan ni tin nun kan hmang chho ta.

Buaina chuan tawp a nei thei meuh lo va, indo a thleng a, ral khat atanga en theih ngawt ni bik hek lo. Khawi emaw zawk zawk tan thawh ve a ngai. Thil tam tak min tiam a, ram tha leh zual chaka tuihalte chuan kan um zui a, min tiam ram ropui thlen chu khawi lam hi a ni ringawt. Rethei bak berhin, in leh lo, silh leh fen tur pawh nei tawh lo, lu nghahna tur tak ngial pawh nei lovin a ni min hnutchhiah ni!

Rual ute chuan 'Hmangaihna' an sawi chamchi a. "Hmangaihna chauh hian engkim a thlak thei," an ti. Mahse, kan hmangaih tura ten min en dan chu hmangaih harsa tak a ni tlat. An tan kan thawk a, an tan kan bei a, chutah min la phatsan zui! Min thunun zo ta lo va, pawl chak tak angin kan kal a, min daltu chu tuk thluk a tul ta. Sipai ang maia pawl pakhat inkulh tha takah kan chhuak a, rawlral tia hnawl chu kan hlawh chhuah a ni.
 
Eitur kan mamawh a, silh leh fen tur kan duh a, tawm hulna tur kan mamawh. Chung zawng zawng nei tur chuan tharum tak meuh meuhva suala beih a ngai a, a hlawha hlawh chhuah a ngai a ni. Kan zalenna ni lo thleng tur chu beiseina nen kan thlir a. Kan theih tawk erawh tlem tak a ni. Rinawm taka lo nghah ngawt chu!
 
Engtik niah emaw chuan nang leh kei hian hla khat kan la sa ang a, puanzar pakhat kan la vai za ngei ang. Chutih hunah chuan kan chakin kan lo puitling deuh deuh tawh ang a, Zalen tiin min ko ve tawh ang.