Kan naupan lai kha chuan Bus pachak a ni mai a, City Bus reng reng hi a la awm lo! TMB chei, a In tur siam kha a ni mai thrin. Threnkhat tan khan lian tih loh chi rual ni hek lo, Zokhaw lama chhungte lokal te khan, “Kan In tia,” tiin ropui hi an ti viau zel a nih kha. Kawngpui kha a awh hmuk zel a nih kha. Kawmthlang mai, Pi Chhingpuii kawt kha a dinna hmun a ni a, kan duh hun hunah kan chuang a, kan duh hun hunah kan chhuk leh mai a, fare reng reng kan chawi ngai lo. Nilengin Aizawl khawpui hi kan hel kan hel mai a ni. Hun a kal ta duai a, mihring pawh kan pung zel a. Town Bus han tih pawh nuai kan kai takah chuan a rem ta lo. ‘City Bus’ kan ti ta tralh a. Nakin lawkah chuan Metro Bus te pawh a la ni lovang tih tunge sawi thei?
Eizawnna avangin ni tin Bus-ah chuan a ngai ta a, mak tak tak, ka beisei ngai reng reng loh ka tawng ta nual mai.
Conductor vengva
Bus-a pawisa khawn hna hi Conductor-te kutah a awm, hei chauh hi an hna a ni lo, Bus-a chuangte tana hawihhawm zir pawh an mamawh kher mai. Thinchhe tak mai leh polite lo lutuk maia pawisa an han khawn thrin hi chu thinrim thlak tak a ni. Chutih rual chuan vengva tak leh fel tak tak pawh hmuh tur an awm ve nual mai. “Kha tawlh leh teh tlem, cheng hnih man a la leng,” tih ringawt hi conductor hna-ah hian tawp suh se. Conductor vengva kan mamawh hle a ni City Bus hian.
Tlawmngaihna hnawl !
Thrutna i neih loh avangin tlawmngaiin miin thrutna an kian che a, threnkhat an trang trung thrin hi mit a lo kham hman thrin. Heng mai mai avang hian kan Mizo tlawmngaihna hi tihdalin a awm thei tlat. Threnkhat chuan tumah an kian duh tawh lo. Mi thrutna ken chu zahna a ni an ti. A dik hmel viau a ni. Chutih rual chuan ken tur awm ngawi ngawih ken nachang hre lo, thralai mawl tak tak pawh kan kat ve nawk tho.
Sikul zirtirna awm lo
Sikul naupang, thrutna-a thru tluan thrak, aia upate thrutna ken nachang hre lo kan va tam tak em. Heng sikul naupangte hi Aizawl-a sikul thra ber ber leh changkang ber ber atranga lehkha zir an ni. Nun erawh an zir tel lo a nih ngai chuan Mizo nun tichhetu tur an va ni tehlul em.
Duh duh sawina
Cellphone a lo ri a - ‘Aw, ka inentir a, ka doctor khan i khua a sik deuh a nih hi a lo ti a..., tlai chawhmeh tur kha chu dal lo siam leh mai rawh,’ tihte hi Bus chhunga ring tak taka kan hriat fo thrin a ni. A changkang lo. Aw.. a va tawi ve. Duhtawk phawt ang aw.
(2006)
0 Comments