Thla eng emaw zah a lo ral a, ber thla kan thlen meuh hi chuan boruak a dang zar tawh. Tlai ni tla tur han eng sen no nghelh maite chuan lung a tileng nghal veng veng ngawt a. Tu ber nge kan ngaih pawh sawi tur kan hre chuang lo. Kumtluan deuh thawin hmun hrang hrangah kawng hran hran zawhin hna hrang hrang kan thawk lawr a. Midangte tana far chhuahna hun insiam hman lo lekin kan hmanhlel a, khawtlangah leh kohhranah buai ber niawm fahranin kan phu suau suau a, midangte tana kan thawh thrat 10 ziah tur hre miah lova kum tluan hi engzah tak awm ang maw? Khaw nge kumin Krismas zawng far khat tal han far chhuak ve teh ang.
Krismas-ah
Ka nu leh pa chu mi zawng zawng zinga sum ngah ber an ni a. Ka nu khel a ruak tak tak thei lo. Ka pa chu pa zawng zawng zinga huai ber nia ngai tlat naupang chuan a nu leh pate sum lakluhna hnar a ngaihtuah pha lo. A nu leh a pate hnenah engkim a mamawh a thlen a, nu leh pate chhanna chu, “Mate, Krismas-ah aw..,” tih a ni.
Rilrua riak Krismas
Kumtluana ‘Krismas-ah’ tih chu rilruah nghet taka tuh a ni. Sunday Sikul-a Lal Isua pian dan an zirte chuan kan Krismas hlutna trawmpui turin thawnthu ang chauha ngaihthlak liam mai a ni, a thuk zia an chhui pha lo. Mi faten naute lem an nei a, fate rawn awt haw chu hmuh hrehawm tak a ni. Mi ta awt reng renga awm kumkhua chu naupang an va khawngaihthlak tak em! Nu tan fate tih thlawn a hrehawm si, ‘Mate, Krismas-ah kan lei ang,’ Krismas kan faten an lo hmuah dan hi ngaihtuah a lo va ngai tak em!
Kan hmuah Krismas
Kohhran lamin sa talh tur buaipuiin patling eng emaw zah a lo ruat a, ruaithreh loh chuan hming chhe dawn tlata inhriatna chu beramte atrangin berampute-ah kan tuhsak a. Mi hlim nia inhriate lah chuan Krismas lenkhawm huna lam dan tur te, thusawi turte an lo ruahman lawk vek tawh. Nula in tlangval hmanpui tur a neih loh chuan mi ten an hmuh dan a dik lo tih a hria a, a zawnna hun atan a hun a hman a ngai a, a mit a len a ngai. Tlangvalte pawh chutiang bawk chu an ni. Thawmhnaw thar leh thil thar ngaihvena bazar lama ni tin kal pawh kan kat leh ta nuk mai.
Krismas a lo thleng ta
A hun a lo thleng a, naupang rilrua rei tak lo intuh tawh kha theihnghilh theih rual a ni tawh lo. Krismas-ah chuan naute lem a awh thrin kha a hre chhuak a, silai lem a thriante ta ang kha a hre chhuak ngei ngei. Chung zawng zawng chu a nu leh pate sum lakluhin a lei thei lo tih reng a ngaihtuah tawh lo. Nu leh pate tan chuan lungngaihna chhumpui a zing a, Bethlehema bawng in lam reng rilruah a leng lo va, zan thiang tak te chu a reh ngawih ngawih a, lung tichhe mai an ni. Bazar hmuna naupang inawmlemna chauh lo chu rilruah engmah a riak tak tak thei lo. Hengte tan hian far khat tal i far ve dawn lo’m ni? (2006)
0 Comments