Wright unauten khawvel hmuha thlawhna an rawn pho chuan khawvelin mak a ti. Bell-an inbiak pawhna hmanrua a rawn siam chhuah meuh chuan mak tiin khawvel a ka hova, tunah erawh a aia changkang humin kan kheuh neuh neuh tawh. ‘Thil’ a awm a, ‘Mak’ a awm bawk a. Thil chuan mak tih a hlawh avanga ‘Thil mak’ a nihna phenah hian thil tam tak a inphum a ni. Kan hmuh ngai loh, hriat ngai loh leh khawih ngai lohte hian ‘Mak’ tih an hlawh mai a. Rei pawh rial lovin a dang a lo awm a, a aia thra leh changkang zawk chu. Tichuan, ‘Mak’ dang a lo awm leh tihna a ni mai! Kan nitin hun hman chu zirna, hriatna, thiamna, finna zawng zawngte piah lamah tumruhna thar chhuak zelin makna khawvelah a siam mek zel a, chu chuan khawvel hi changkanna khawvelah a siam zu nia!
Kailawn zawh thiam....
Miin zirna zulzuia thiamna thar paw chhuak tur khawpa tumruhna nei a, changkanna an chhawp theih thrin vang hian a lawm, mite hian thil mak an tih thrin a, thil mak an chhawp thrin ni! He kailawn ang hian keini zawng kan inchhep ve thiam lo hi thil mak a ni ve hlauh thung! A let zawngin kan kal a, changkan kan hmasak thrin vang hi ni maw, a tawpah kan zuzi fo thrin.
Kan fate inawmlemna hi
Television-in Zoram a run hmaa naupang lo ni tawh, tuna puitling tam takte naupanlai leh tuna naupang, kan fate hi han khaikhin teh. T.V. awm hma chuan radio atrangin thu bengvar thlak tak takte ngaihthlak a ni thrin a, sawptrawnga chhuak chanchinbu leh lehkhabute chu khang hunlaia sikul naupangte inawmna pakhat a ni thrin. Tunah erawh T.V. in changkanna khawvel a rawn chuangkai a, in tin min luh chhuah meuh chuan kan fate chu an changkang tawh hle a, an inawmna pawh media lam thil changkang ber berte an ni. Mahse, an mawl tlat!!
Chan loh khanah an chhuak em?
T.V kan fate kan chhawp sak a, nilengin cartoon an en a, kan hmehsawn sak ngam leh tawh mang si lo va, puitling paw’n kan nuihpui uar uar a, Bey-Blade hman dan leh Popeye-a chakna te chu an hre em em a, thildangah erawh hriatna an nei chau hle thung. FTV an en a, engtiang fakauvin nge designer leh model ni tur hian thawh nasat a ngaih tih lam an ngaihtuah thleng pha hauh lo. Tunge sexy leh tunge nalh erawh chu zawh an ngai miah lo! Computer an thrutchilh a, en miah lovin games khelh nan a chhutna an hmeh thiam laiin an hming chhu tur chuan hmai si lo chuahin a hmehna an melh leh thung si. Internet an hmelhriat a, site thra aiin chat an thiam zawk a, bengvarna site aiin XXX site hrang hrangte chu an hmelhriat tam zawk fe. Kan fate changkanna khawvela thil changkang kan chhawp thrin hian kan chan loh khanah min chhuahpui mai ang em?
Tumruhna tel lo changkanna hi
Lo tawngpawng ruh ve ngawt ila, tum awm si lo se, a ho awm! Kan fate football khel tur chuan Jersey mawi ber ber leh to ber ber an mamawh a, Football pet hma hauhin a petna tur savun pheikhawk pawh an duhtui khawp mai. Chutiang an neih loh chuan field lam an pan thra duh ta hauh lo hi ‘MAK’ a tling leh ta pek! Skill an ti emawniah hian kan sang filawr lak a, mah se, a tak takah erawh hmantlak kan chhuak tlem hle thung. Jersey nalh, ball-boot thra neih lam tum ruh, a khelh leh a zir lama tumruhna tak tak nei lo tam tak kan tam avang hian Mizo zuzi rual awmkhawm ringawt pawh hi tawrhlelhawm tham kan awm ta reng nia! Chutiang chiah chu kan lehkhazir dan pawh hi a ni. Tumruhna leh thiamna lam aiin changkanna kan dah pawimawh hmasa a, thiamna tak tak pawchhuak mang si lo hian kan inhlangkai ve naw naw a, quality nei lem lovin kan hawi ang phuau reng mai zawng a nih hi maw.
Zirna avanga thiamna pawchhuak thei tur khawpa tumruhna kan neih hnuah changkanna hi chu kan changphak tur a ni tih hria ila chuan, ‘MAK’ tam tak hi kan kutchhuak a ni ve nual tawh awm asin maw le! (2006)
0 Comments