Bus chhunga lo chuangte chuan rawn lut thar chu khawngaih hmel takin an lo thlir thrap a. A tiang rawn hawl chuan a kalna tur chu a hâwl kual a. Thrutna awl ni ngeia a hriatah chuan a thru a, a ip khai chu a malchungah chuan a dah a, a tiang chu a sirah chuan a dah bawk a.
Kum eng emaw zah liam tawhah khan Susan-i hi damdawi dik lo chawh avangin a mitte chuan khua a hmu ta lo va, thawk leh khatah a khawvel chu a thim vek a, thinrimna leh mahni inkhawngaihnain a hun a hmang thrin.
Engang pawhin thinrimin Pathian hnenahte thlen thrin mah se a khaw hmuhna tur erawh a rawn thleng si lo! Khawvelah innghahna pakhat; a pasal Mark-a chauh a nei.
Mark chu Air Force Officer a ni a, a hinlung leh a zawng zawngin a nupui Susan chu a hmangaih a ni. A mit a del atrang phei chuan khawngaihna nen ni tin a fuih sauh sauh thrin a. Mahni inringtawk ve tak a nih thrinna ten a kiansan ta hle a ni tih a hriat phei chuan a rilru a na zual a ni.
Hna thawh nei a ni a, hun rei tak a chawlh hnuah a hna chu zawm leh turin a kal a ngai ta! Eng tin tak a hna chu zawm ang maw? Amah maiin eng tin nge Bus-ah chuan a chuan tak ang? A pasal chuan a hrethiam hle a, an hnathawhna hmun chu chhim leh hmar daih ni mah se a nupui chu a Bus-ah chuan chuanpuiin a thlah ziah a, a lam ziah thrin.
Hun a lo ral a, thil a lo danglam ta. Chutianga an pahniha Bus khata an chuan ziah a, a pasal zawkin Bus dang mana a hnathawhna hmuna kal ziah chu sum leh huna hek hle a ni tih chu hairual a ni lo. Mark-a chu a hnathawhna hmunah a tlai ziah lehnghal!
Inrinni a ni a, office chawlh a ni. Thawhtran atrang chuan mahnia kal a tum tawh thu a pasal hnenah chuan a hrilh a. Mark-a chuan mak a ti kher mai. Mahse a hriatah erawh sawi chhuah kher a tum lo, “A thra a lawm,” a lo ti liam mai a.
Thawhtranni chu a lo thleng a, amaha kal tur chuan a inbuatsaih ta. A kal hma chuan Mark-a chu a kuah vawng vawng a, a pasal, amah hruai thrintu, amah hmangaihtu leh a thrian chu thlahlel takin a kuah a ni.
Amaha theihna awmte chu a hman a ngai dawn a, a mita mittui tlingte chu luantir loh a tum ruh hle. A vawikhatna atan chuan harsa ti tak hian, “A nih leh aw,” a ti tham triak a. Anmahni kawng ve ve chu an zawh ta.
Thawhlehni a lo thleng a, Nilaini, Ningani chutiang zelin amahin kawng a indap chawp chho ta zel a. A rilruah chuan kim lo riauva inhriatna nei mah se harsatna danglam tehchiam a tawk hran lo.
Kar hnih a ral ta reng mai. Zirtawpni a lo thleng a, a tih dan pangngai angin Bus-ah chuan a lut leh a, a chhuk dawn chuan conductor hnenah chuan a chuan man a pe a. Conductor chuan, “Ka awt ngawt mai che,” a lo ti a. Engtia chutiang mitdelte han awh ngawt tak mai chu! “Enteh, ngaihvenna leh venna hnuaia hetianga awm reng hi a nawm hmel em asin.” Susan-i chuan a thusawi chu a hrethiam lo kher mai.
Conductor chuan, “ Tuk tin Bus-a i rawn chuan apiang hian pa pakhat sipai thuama inthuam hian a rawn zui lut ziah che a, i chhuk hnuah kawng i kan dik leh dik loh chenin a thlir zui ziah che asin. Office i luh dawnah a kut chuan a hmui tawk zauhvin i lam hawi hian a rawn chhem thrin a, khawng taka dingin salute a pe thrin che a ni,” a ti a.
0 Comments