Putar tawh tak chu a fapa nen an inhnial a. Pawi a tih em avangin a fapa hnenah chuan vawi tam tak ngaihdam dil a tum a. A fapa erawh chuan a ngaihthlaksak duh ngai lo. Chumi avang erawh chuan ngaihdam dil chu a thrulh chuang lo va, a fapa chu a neihchhun, a hmangaih em em a ni tlat a tin ni!
Kum eng emaw zah a liam ta, ngaihdam dil a tum pawh a la hlawhtling chuang lo va, thihna khuma a mutlai pawhin ngaihdam chu dil a la tum fan tho nia! Mahse e, a la hlawhtling chuang lo. A fapa thinlung chapo tak chu tihkhauh tlat a ni.
A fapa chuan chhungkuate dinin fate pawh a nei duah tawh a, tleirawl hre rual an ni ve ta reng mai. A fate hnenah chuan a pa chanchin chu vawi khat mah a sawi lang ngai lo! A faten an pu chanchin an han zawh changte hian, “Vawi khat mah chutiang chu min zawt tawh suh u,” tiin a chhang mai zel.
Ni khat chu a fapa nen chuan namen lovin an inhnial a, a fapa chuan a la chhuahsan zui. A pa nena an inhnialna kha a hrechhuak zawk a. Amahah chuan chhuan tur leh chapopui tur a lo nei hauh lo tih a inhre ta. A mangang chu han tluk luhna mai tur a hre ta hauh lo mai.
A thru hnawk a, a fapa chu a hlauh hlen ang tih a hlau tak chung chuan kum eng emaw zah hnu atan a vawi khat nan Pathian hnenah a trawngtrai ve tawp a. A trawngtrai zo chu hmana a pa nena an inhnial dan kha a ngaihtuah chhuak ta zawk mai.
A pa rilru a tihnat dan turte chu a han ngaihtuah a, chutah tak chuan a dinhmun chu a inhre chiang lehzual ta. A ngaihtuah chian poh leh a thiam loh zia a inhre tam tawlh tawlh a, a pa khan a hmangaihin a tan engmah a ui ngai lo a nih kha. A inngaihtuah hah lutuk chu engtiklaiin nge a lo mutthluk pawh a inhre lo. A tuk khua a lo var chuan thil danglam tak a hmu ta!
A bul maiah chuan a fapa, nimina thinrim taka in chhuahsan chu a lo ding reng mai. A han inhmu chu an inkuah ngawih ngawih a. A fapa chuan mumang mak deuh a lo nei niin. A mumangah chuan putar pakhat hian hmangaih takin a lo kuah ngawih ngawih a. Chumi avang chuan a pa a huatna zawng zawng pawh chu a reh phah ta a ni. Chu thu a pa hnena a han hrilh chu a pa chuan mak a ti hle mai a, kum tam tak liam ta a a pa nena an inhnial dan chanchinte chu a hrilh let ve ta a. A fapa chuan a pu chu hriatchian a chak hle tih a hmelah chuan a lang reng.
Thingrem hlui tawh takah hian thlalak hlui tawh tak hi a pa chuan a rawn phawrh a. Uluk leh dim taka rawn kengin a fapa hnenah chuan a pe a. A pa ngaihdam dilna a ngaihsak duh lo pawi a tih thute chu a sawi hliam hliam a. A fapa erawh chuan a pu thlalak chu a en reng thung. Zana a mumanga a hmuh kha a ni.
0 Comments