ON MY WEDDING DAY

Nizan chu kha hla kha ka lunglenpui a, i hre ve tawh ngai em; Don Henley hi.” “Lutuk ringawt! Patty Smith nena a thrianga an zai dun kha ka hriat hmasak ber a ni a... Eagles leh a neuh neuh pawh ka hre ve nual. A hma chuan football player a ni thrin a.., a hming tak pawh Donald Hugh Henley a ni a, khuangpu thiam tak a ni nghe nghe. ‘Lovers Moon’ hit-tu Glen Frey nen hian he rimawi kawng chhuk chho hi an lo hrut ve hrep tawh a, Elton John-a pawh hian, ‘Zaithiam mipa zinga khawvela part pe thiam ber.’ a ti asin,” tiin ka chhang liam mai a. Ka thil zawnlaiah chuan ka bursan leh nghal a. Chutah a UMAX woofer lei thar chu chhuang ni awm tak hian a herh ring zual sauh a. “Hei hi a lawm,” tiin min han ngaihthlak tir ta a...
I will dress in black
Ka palai tirhte hmel hlim tak ka hmu a, an thu rawn hawn chuan min tihlim kher mai. Kawrchung dum ka mamawh dawn tlat! Ka han inngaihtuah a, keia kara parawl, pachhe bawk si tan chuan Dolcé siam tih bawr chu ngaihtuah phâk loh tawp tur a ni. Kawrchung dum chu ka thawhchhuah tlema zawngte ka khawn khawm chuan ka lei ve thei ngei ang.
Chumi mil tur chu kekawr ka nei sa a, pheikhawk pawh a hlui lutuk tih tur ni lo tawk chu ka la nei bawk.
Hnunglam hawi thei ka ni ta lo tawp nia! Hun rei tak chhung ka kawnga chhum chhah tak awma kha ka tan a inhawng ta! Ka thinlung hmun ruak reng thrin kha hnawh khah a ni dawn. Ka tihtur hi ka damchhunga ka hun tawn ropui ber tur a ni tlat.
On my Wedding Day
Kawla nichhuak chhiara eizawng ka nih avangin ka sum neih tur ang zat chu in ngaihtuahna aia tlem hrat a ni ngei ang. Chutiang khawpa pachhia chu nimahila kan inneih ni atana ka trawngtraina hla tur chu; ‘Ka mamawh chu ka nei ta a, khawngaihna avanga pek ka ni,’ tih tê hi a ni.
I dont want violins
Tlang ruai ka siamsak thei dawn loh avangin zaipawl sawm ngam tur ka ni lo phawt a. He hun atan hian ka mamawh ber an ni lo bawk.. Rimawi leh zai pawh ka mamawh hek lo. Inneih sawmna card mawi leina tur ka nei lo va, tlang hraina tur chu sawi loh, ka in luahna neitute tan tak ngial pawh chawhlui ka siamsak thei lo vang. Chuvang chuan Biak In mawi tawk pawh mi an rawn kal ka ring lo. Ka threnrual thra tlem tê leh ka inhlawhpui, pachhe berh ve tak takte chu Kan nupa inkara khawvela hmangaihna awm zawng zawng hi a luanluh theih nan min trawngtraipui turin ka thlang zawk.
I dream
Martin Luther King Jr. pawh khan suangtuahna ropui a hnutchhiah tak kha maw! Kha suangtuahna ropui lutuk khan mite hnenah thuchah ropui tak a siam a nih tak kha.
A eng lam hlir thlir thrin mi ka ni chuan ka inhre ve a, chuti ni lo se chuan tunah pawh hian nupui ka hmuh ka la inring miah lo! Ka suangtuah nate leh ka hmathlirte chuan mi a tiphur a, kawng eng lam chu ka thlir trang trang thrin.
We have tried
Nia! Midangte aia kan danglamna teh chiam han sawi tur ka hnutchhiah chuang hauh lo. Mipa leh hmeichhia induh takte innei ang tho kan ni. Kan tum ve ren rawn thrin a, kan thrulh leh fo. Mi rethei tlangval, tlangvala zawnga tlangval naran ve mai chu pasal atana han neih ngam ka ni miah lo.Mahse, a huaisenna erawh ka theihnghilh thei lo. Beiseina te a thamral mai hlauhawm khawp dinhmuna ding thrin chuan min hriatthiampui ve hian ka ring a ni.
Mahse, ka vannei asin! Mi vannei ber ka ni. Chu chu ka theihnghilh thei lo va, kan inkarah hian khi a awm ang tih ka hlauh em avangin; chunglama trawngtraina chhangtu hnenah pawh kei misual ve mai hian zu thlen ve fo va maw le!

- 22 JULY,2007