KUTDAWH

Khawlaia rimawi tuma aw rawl tawp nena lo zai thle lawp lawp chu ka melh a, ka ip-a ka pual pawisa awm pawh chu ka hre reng. A nawi ber kha chawlhni tuka an khawn, ‘Rinna Thutiam’ an tih chu a daih ve trat a. Ka phawrh a, bawm a ka thlak mai chuan a tuk mai a, chanchinbu man min rawn thrin tur a daih bawk si. A nawi lo ka ah ve te lah chu inrinni bazaar-na atana hisap nei rana ziahfel vek tawh a ni. Aw... kutdawh khawngaihthlak tak mai chu..!! Khawtlang leh Kohhran-in kut a dawh chu ka ngaih pawimawh a ngai ta tlat nia!!
Chawlhni sakei
Chawlhni zing a lo thleng a, trum danga kan in rawn chuangkai ngai miah lo, patling un tak tak, hnar ngam loh tur thrah dawrzawn chanve vel hian khawtlang leh kohhran tan kut an rawn dawh ta liam liam a. Ka puala ka hman tur pawisa, mitdel kutdawh laka ka ui kha ka phawrh fai ta leu mai! A bak dawrzawn chanve lo la kal turte chu ka ngaihtuah a, eng tin nge kan tih tak ang? Thawkchhuaktu ber lu a hai ta tlat. Kan ui cher lutuk kaw chhung pawh kan khawrh fai leu tawh. Mi ta kan kawlte kha ka’n han ngaihtuah chhuak a, chumi chu lo pek mai turin ka rilru ka siam ve tawp. Mahse, mi ta kan hmansakte chu min rulhsak leh ang em? Khawtlang leh kohhrana hming thrat loh ka hlau ve bawk si, chanvo eng eng emaw ka lo nei ve bawk si, pa ber lu a hai tak zet a ni. Khawn tam lutuk hi ka hne!
Thawhtran sakeibaknei
A tuk thawhtranni a ni. Hna thawhna lama kal a ngai a, kan sum kawl ve zawng zawng erawh thruahfai a ni tawh. Hna lama kal lovin inah ka thru mai mai a. Chhunah chuan vai pakhat, bal trawp hrip hrep hian kut a rawn dawh a. Sum nei lo thinrim nen a innnang bawk si. “Kut dawh lovin hna thawk ta che,” tiin ka lo hrawk ta hrep a. A kal liam tak hnu chuan ka inngaihtuah ta vak mai nia. Enga tinge sum lalut turin khawtlang leh kohhran leh kohhran thralaite hian hna an thawh ve mai loh? Enga ti nge awmsa ringa mi neihsa an rin zel? Thawkchhuaktu ni ve loh chuan a rip zia ka lo ngaihtuah ngai miah lo chu niin. Mahni thawhchhuah bei tham tak hmanga khawtlang leh kohhran kan han chawm hlawm ngawt mai chu le? ti ten ka inngaihtuah lungpuam ta. Ka rilru pawh a sakeibaknei ta viau.
Thruro iang
Tichuan, thawk leh khatah mak tak maiin hrilhfiahna ka thinlungah a rawn ri ta. A khawntu takte hi a nia inthlahrung ni. Nu ber zing tho phak lutuk han hmachhawnte hi an lo hreh em em chu lo niin. Nu ber tho phang thinrim chuan a lo an khum a, thinrim rilru treuh chung chuan an haw a, haw kawngah, ‘Aw sum hmuh dan kawng dangte hi a awm lo em ni le, hna thawh tih lamte hi an sawi ri mang si lo va, a khawn lamah hian an truan leh ngawt zel a, a khawntu taka tran hi a va hrehawm em,’ tiin an phun haw nuah nuah a. Thinrim treuhvin In an thleng a, threnawmnu rapthlakzia chu hahipin an sawi zui ta chiam thrin.
Kan sum thawh chhuah ve, tlem tê a mamawhtu hnena pe theia kan awm hi kan lo vannei letling zawk a nih hi tiin ka inngaihtuah chhuak ta. Ka nem ta trulh mai!

15 APRIL, 2007