CHAK BER

Amah chu lung changthra taka thuam a ni lo va, Angel a ni lo va, ramhuai leh naupang pawh a ni hek lo. Thisen leh tisaa siam, pa pangai ve mai a ni. Anchhe trawp tak tak leh thlan tih tham tak hmanga a hlawh chhuah a hmaia ser lian hre hraw chu a chhuang hle.
Vawi tam tak PA taka chakna chang ve tawh turin an hrilh a. Chu erawh chuan hlawhchhuah a neihpui ngai chuang lo. Amah fuihtute lah chuan hnungchhawn chung hian, “Bawiha a thra lutuk tho ve,” an ti liam vel mai mai thrin. A hmel hem loh nana lu hren chu a kuttum chuan a han chum a, “MIPA angin aw,” tiin a infuih sauh sauh va.
A thinrimna chuan mittui a ko va, chu chuan chhuat char pawh sawi lovin a lehtir ta hual mai a. A rawn tho leh a, tumruhna tak tak nen chak ngei beiseiin a rawn ding a ni.
A taksa khur dat dat chu a han siam rem a, a thinlungte chuan hnehna a rawn aupui a. A thlarau thim lutuk atrang chuan mei a rawn inchhem a, a mitah a rawn alh chhuak a. Chawl leh tha thlah hauh lovin a bei ta. A bei a, a chau a ni. A ri fua a, tawrh zawh rual loh chu a tawrh a ngai tlat!
A ke thate chu tihzawi a thiang lo, sakawr pa ang tlata chaka zuan thauh thauh a ngai a, a ban erawh a zawi si. “Ka hneh tur a ni,” tiin a infuih leh a. “Enga tan maw?”
Enteh! Hun a tawp dawn hnai ta. A thawte chu a chham titih tawh mai a, a tihrawlte chuan ke neise chuan an tlanchhiatsan tawh ngei ang.
A ke chuan a zo tawh lo va, a tlu mai dawn ta! Mahse MIPA a ni a, a tluksan chuan a chan tur chu a hre reng.
He hringnun inbuannaa sual hneh thei hi tlem tê an ni. Chu chu a hre reng a. Tlem tê tipungtu nih chu a tum a ni bawk.
A theihna zawng zawng a sawm a, a ban chu a han vai kual pawp a, a kein a zo ta lo a tlu tur chu bang hrulah chuan a indawm thei hram a.
Thawm a thra hle mai. A tumpui chu a hneh nge a tumpui chuan a hneh ta zawk pawh a hre lo. A mit deuh sulh ta mai!
Amah trantute chu an au teng tung tawh a, an mangang nge an lawm pawh a hre chuang lo. A han insiam rem a, a tranpuite hmel chu a han en a, an hmelah chuan chhuan tur nge zahpui tur a nih tih lah a hriat bawk hek lo.
Threnkhat chuan ralkhat atrang hian INCHAIMI an lo ti a. Threnkhatin MIPA a ni an lo ti bawk. A piah lawk a han hawi hnu chuan CHAK a ni tih a inhre ta.
Endiktupa chuan a ban zawi tak chu a rawn la a, a rawn phartir ta a.