Mizo Mizona han tih deuh duah hian thrangtharte zingah awmzia a nei lutuk ta lo em? Upa zawkte rilrua chiang tak si kha kan thrangtharte zingah erawh sep zui hlawh tak a ni chho ta reng mai.
Changkang vak lote sawinan ‘A va Zo treh trawh ve,’ tih kan hman tak daih vang hian a ni ta ve ang Mizo Mizona tih hian awmzia a neih tak loh tihte pawh ngaihtuah tham tak zu nia.
I han Mizo dawn teh ang!

Khawilai hi nge kan Zona tur chu?

 Kan tlawmngaihna leh huaisenna hi han la vung vak dawn ila ~ keini aia tlawmngai leh huaisen awm mah hnam dang zingah an lo tam ve mai a. Kan siapsuapte kha han inbelpui leh dawn ila, Mary, Spa-a in-massage a Boutique design chauh ha thrin chuan a duh tawh dawn lo phawt! Lu te kha han la leh sawk sawk ila ~ Lock-up-ah i tang ang a, CJ lamah thawn liam i ni mai dawn a ni! Threnawmte inah zupui nen han chai leh ngawt dawn ila ~ MLTP Act a lo inhung ruau mai a! Lovah han feh tlang leh dial dial dawn ila, lawmte kha han nei leh bawk ila ~ Stephan-a a lo awm no laklawh tawh si, Karizma nen lo chuan chhai thar di a tawng thei ta meuh lo. E taka! Sial te kha han chhunin khuangte kha han chawi leh dawn ila, PETA an hrâng lutuk leh dawn a, i ngam lo sa! A lo tam ta mai a - mi thiam an lo chhuak chho zel a, kan chhuahna hriatchian loh, thlahtu bul pawh hriat chian theih lohvin kan lo awm reng mai tihte an rawn hre chhawm zel a, a tawpah chuan Pathian hnam thlanah kan inbarh lut leh ta nge nge a ni. Em?

A phek lehlam atrangin aw...

“Mami khawhar inah leh mithi inah chuan puan bih hram rawh. A mawiin a Zo a ni,” tiin kan fate kan han hrilh thla ngawt a. Puan kan bihna lai tak kha a Zo a nih chuan hnamdang hmeichhe zingah puan bih sawi tur awm hre lo mah se, a veng ang zawng tala inbel hmuh tur an lo awm ve lawi a. Chu chu an hre tlat. Mizo nihna chawivulna atan kan hmang dawn a nih chuan Mizo hmeichhia zawng zawngin bih tur tih thupek khauh lutuk chhuah ta mai ila.

Ti tak tak teh ang!

 Khawhar ina kekawr ha hmu Zo thei tlat lo, Non-Mizo zaipawl tlar hmaa kan fanu zai hmu Zo em em nih hi a zia lovin a Zo lo zawk lo maw? tihte min ngaihtuah tir ta daih a! Chutiang bawk chuan kan Mizona tidaltu chu he’ng angte hi a ni chho zel ang em? Mizo nula, hnam dang zaipawl hmingpua zai, hnam dang hmuh tur awm leh si lo va, a tlar hmaa zau taka ang pawm pawmte hian Mizo an nihna hi an tidal ka ti ve tlat. Daih mai a!
Rawngbawlna tiin kan thlahthlam viau a ni thei, kan ngaisang viau a ni hlauh thei bawk. Beng sika han ngaihtuah erawh chuan Mizo hi kan lo Non zawk lek a lo ni mai ang em? Nge kan tih peih loh an tih avang hian Mizo thralai tam takte hian kan ngaisang viau?

Tunlai inhnialna titam pawl chu kan identity chungchang hi a ni. He thil rawn phawn chhuah vak nachhan hi zawhna eng emaw a awm thei. Eng dang ni lovin ka da zo ta a ni ber e. Han hawi vel ila ~ kan bul velah chuan hnam dang tih dan hlir hmuh tur leh hriattur a awm a, min chamchilh ni tin ta mai zawng a nih hi.

Kan hnam upat loh vangin hnam dang tihdan kan la zung zung a, an thlenga ruaithreh pawh kan hnial ta lo.Kan pi leh puten an lo chin thrin leh an lo puithupui ka sel lo. Mahse bu kan let thei tawh lo tih erawh ka tarlang hram duh.

A bul berah chuan kan trawng hian min la ti Mizo va. Khawhar kan inlenpuite, chhiatni thratnia kan inpeizawn dial dial thrinte tranpui ngaite tranpui duhna thinlung pu rana kan han hawi vel thrinte hian min la chawi nung hram hram mai a lo ni a.
14th October, 2007