KRISMAS THUCHAH

Cornwall khaw tê tak tê chuan chu ni ropui lo thlen hun chu hmuakin an thlir a, inpuahchahna pawhin a vawrtawp a thleng chho tran ta reng mai.

Urlawk zan a ni a, mi zawng zawng chu an helhhawlh tawh. Hemi zan hian kum tina an tih dan angin naupangte chuan intihhlimna hun an hmang leh a, Krismas lemchan an entir thrin. Chu hunah chuan Cornwall khuaa naupang zawng zawng chu tel vek tumin an inpuahchah a ni.

Hei vang tak hian Harold-a chuan buaina a tawk ta. Harold-a chu naupang dangte ang lo takin a truan a muang a, a trawng a la ban zui. Chuti chung chuan lemchana tel ve ngei chu a tum tlat a, hei hi buaina chu a ni! Lemchan buaipuitu chu Harold-a chu a thlir a, an lemchan tibahlah theitu a ni tih a hria a, a tui hlawl lo.

Naupang a nih ve miau avangin chumi zanah chuan hun a nei ve ngei tur a ni bawk si. Ngaihtuahna thra tak a nei a, a hrechhuak ta. Harold-a chu vawi khat chauh a rawn lang ang a, tlar khat lek thu a sawi ang, “Pawi ka ti hle mai! Pindan ruak ka nei tawh lo,” tih tê chu. An tih dan turte an han sawi fel a, an tichhin nghal a: Mari chauh hmel tak, Josefa’n a rawn kuah laite chu duhthusam a thra a ni. Harold-a chuan, “Pawi ka ti hle mai, Pindan ruak ka nei tawh lo,” a lo ti a. Thra lutuk!

A hun a lo thleng ta. Biak In-ah chuan mi an thrahnem hle a, Biak in tual pawh an khat ve hmarh mai. Mari leh Josefa chu an rawn chhuak dun a, entu mipuite chu an ngawi thrap a, hmuhnawm chu an thlir a ni.

Bethlehem-ah chuan riahna an zawng a, an vak an vak a. A tawpah chuan riahbuk pakhat an thleng ta. Kawngkhar zawn an thlen chuan Josefa chuan kawngka chu an kik karh karh a. Harold-a chuan a rawn hawng a.
“Pindan ruak, thlenna tur i nei em?”

Thawm chu a reh hle a, Harold-a lah chu a trawng ta mai lo! A tawp a tawpah harsa ti tak hian “Pawi ka ti khawp mai, pindan ruak ka nei tawh lo,” ti pahihn kawngkhar chu a khar ri bur a. A buaipuitupa chu a thaw hawk nghe nghe.

Josefa beidawng hmel chu ang tak a ni a, naupang chan atan chuan duhthusam a ni. A nupui Mari chu a kai a, muangchang hian an kal dun a, dawhsan an chhuahsan dawn tih chuan buaina a rawn chhuak ta tlat mai!

Kawngkhar a rawn inhawng sawk a,“Josef ngawi lawk teh! La kal teh suh. Mari kha rawn hruai la, ka pindanah in cheng mai dawn nia,” tiin Harold chu a rawn au vak mai a.

Mipui mak ti chu an hawi an hawi a, tumah reng erawh an trawng chuang lo. Mi pakhat, Cronwall khaw tiraltritu Thomas-a chu a rawn ding chhuak a, dawhsan lam chu panin Harold-a chu han kuah a, a trap ta hawm hawm mai a.

“Lalpa! enteh ka thinlung pindan-ah hian hmun ruak i chang ngai lo. Ka hriattheih ata i tan pindan zuah nachang ka hre lo va, midangte thlen turah ka lo dah thrin che a, min ngaidam ang che.”

Kut beng thawm chu ring tak a ni. Harold-a erawh a hawi hai hle thung. A tuk mai chu Krismas a ni tawh a, kawngkhar chu tunge rawn kik dawn le?