MPF-te ngam loh BIG THREE!!!

MPF, Mizorama Inthlanna thianghlim a awm theih beiseia pawl ding, Presbyterian Kohhran kaihhruai leh Political Party ten an lo rawt Vantlang inkhawm Political Party mala neih loh tih chu an kaltlangpui ngam ta lo! Mizoramah Big Three, ManMohan Singh, Rahul Gandhi leh Sonia Gandhi-te rawn kalin Vantlang inkhawm, an party tan an rawn buatsaih a. India rama rorelna chang mektu leh lalna chelh mektu khap ngam leh khap thei dinhmunah MPF hi a lo ding lo reng reng a nih hmel ta e.



Central lam chu kan lo ngam vak lo pawh a ni maithei. Chutih rual chuan MNF, UDA te an khawngaihthlak hle mai.

SAWI BELHNA

Inthlang rama awm kan nih angin Mizoramin Inthlanpui leh Inthlan neuh neuh kan hmachhawn hnem ve ta viau. Inthlanna felfai leh thianghlim tak a awm kan duh a, chutiang a thlen laiin chutiang reng chuan kan kal seng ta lo ni berin a lang. Inthlanna felfai tak a awm theih nan Kohhran leh pawl eng eng emaw ten thuchhuah an siam a, a chang chuan pawl pakhat aia tamin thuchhuah intrawmte pawh an siam chang a awm. A zawm tura an duha te hian kan zawm tak tak loh avangin a taka thawk tur pawl din a ngai a, MPF: Mizoram People's Forum hi a lo piang ta a ni a tih theih awm e.

MPF chu
2006 kum khan Kohhran pawl hrang hrang leh NGO aiawh kalkhawm chuan Mizoram People Forum an din a. He pawl hi Mizorama Sorkar thra leh rorelna dik a awm theihna tura Kohhran leh Tlawmngai pawl hrang hrangte vawi eng emaw zat an inrawn khawmna bawhzuia din a ni ta a ni.Mizoramah rorelna thra leh dik, remna leh muanna, hmasawnna thra leh mipui zalenna a awm theih nan he pawl hi din a ni.

Ka thlir dan
Politik hi khawtlang ro inrel dan leh inawp dan atrang daih tawh a intran a nih avangin he khelmualah hian Kohhranin ball chan a tum hi dik lo a ni! Politik chu trawp a ni. Chumi trawp thenfai tum hi buaithlak a ni. Mi tam takin an hlawhchhama Kohhran inrawlh a ngai ta mai hi zahthlak a tling bawk. Hetiang a nih chuan Khawtlang inrelbawlna chungah Kohhran hi LAL takin a leng dawn tihna a ni thei a. A ni lovang tia trang pawh kan awm ang, tun ang renga hetianga MPF an inrawlh zel dawn chuan Inthlanpui vawi 3 chuang kan kalpui hnuah engang takin nge Mizoram hruaitute hi Kohhran hian thunun ang tih hi ngaihtuahnaa awm a ni. Kohhran chu Pathian din a ni a, a inrelbawlna pawh a thra a, chung zinga thunei leh rorel thei chinten min kaihhruai chuan Mizoram hi nuam tak ni mai awm a nih laiin Politik nen a inbelh vaih chuan Kohhran hi Politik hian a khelmualah a hnuklut thuai ang a, kan thratpui aiin kan chhiatpui thei.

Inthlanpuia kan inthlan dan dik lo chungchangah chuan siamthrat dan kawng a dap a, buai hle laiin YMA, MZP, MHIP etc-a kan inthlan dan thianghlim tawk lo erawh ngaihven a hlawh tawk lo tih a chiang. Kan NGO hrawl rualte an thunun theih loh laia Politik kalphung tihdanglama siksawi hi eng ngaihtuahna thra nge ni ang aw tih ka ngaihtuah bawk.

Sum inpek lo, sum hmanga vote zawn loh te chu Election Code of Conduct-ah pawh a chuang a, a thra e, i zawm ang u. Mahse, House-2-House campaign te, Vantlang inkhawm te, Poster tar dan te thlenga kan inkhap titih hi chu trul ka ti lo. Veng tlabirh deuhte kan awm a, kan veng dinhmun te, kan vengah khawi lai nge step siam ngai tih te, tuikhur khawiah hian nge awm se thra ang tihte an hriat theihna hmanraw thra ber chu House-2-House campaign hi niah ka ngai ve tlat!

Heng zawng zawnga thiam loh changtu chu a dik takah chuan Kohhran leh NGO te ni lovin Politikal Party-te an ni ka ti lo thei lo. Engvangin nge heng dan danglam takte hi duanpui theiha an awm. Midang party huphurh lutuk vanga piang a ni thei a, a ni lo thei bawk. Tih leh a awm ngai a nih chuan Politikal Party-te hi harhchhuak mawlh se, a tawk chin bithliah thiam rawh se. Hmun threnkhatah chuan Inthlan nia Party Offit siam loh te an ti a, Party mi leh saten Roll-a hming chuang inensak pawh an khap. Heng hunah te hian inpuanhnuaina hun thra kan siamsak leh thei tihte pawh ngaihtuah chu a ngai a ni.

Hetiang teh nuai a nihlai hiana indin tirha puipate zinga tel Baptist Churh of Mizoram leh Roman Catholic-te hian engvangin nge an chhuahsan tih hi ngaihtuahna tithui tak a ni. Presbyterian Kohhran hi Mizorama NGO hrawl pathum YMA, MHIP leh MUP ten tunah chuan an la thawhpui a, hei vang chauhva hetiang dinhmun hi thleng thei a ni em?

Mahni pawh inrel fel thei lo hian midang buaipui tlat chakna hi mihring thinlungah hian a lian ve a. Kan pawla eiru, politician eiru sum thawh thrate erawh chuan chanvo duhawm an chang lawi si te hi MAK a va ni tak em... Khawilaiah nge siamthratna hi tran tur tihah a ni ka buai tak zawk ni.
(24th November, 2008. 11:00pm)